1 Chronicles 22

¹ And Dauid seide to Salomon, My sone, it was my wille to bilde an hows to the name of my Lord God; 2 but the word of the Lord was made to me, and seide, Thou hast sched out myche blood, and thou hast fouyt ful many batels; thou mayst not bilde an hows to my name, for thou hast sched out so myche blood bifor me; 3 the sone that schal be borun to thee, schal be a man most pesible, for Y schal make hym to haue reste of alle hise enemyes bi cumpas, and for this cause he schal be clepid pesible, and Y schal yyue pees and reste in Israel in alle hise daies. 4 He schal bilde an hows to my name; he schal be to me in to a sone, and Y schal be to hym in to a fadir, and Y schal make stidefast the seete of his rewme on Israel withouten ende. 5 Now therfor, my sone, the Lord be with thee, and haue thou prosperite, and bilde thou an hows to thi Lord God, as he spak of thee. ⁶ And the Lord yyue to thee prudence and wit, that thou mow gouerne Israel, and kepe the lawe of thi Lord God. 7 For thanne thou maist profite, if thou kepist the comaundementis and domes, whiche the Lord comaundide to Moises, that he schulde teche Israel; be thou coumfortid, and do manli, drede thou not with outforth, nether drede thou with ynne. 8 Lo! in my pouert Y haue maad redi the costis of the hows of the Lord; an hundrid thousinde talentis of gold, and a thousynde thousynde talentis of siluer; sotheli of bras and irun is no weiyte, for the noumbre is ouercomun bi greetnesse; Y haue maad redi trees and stoonys to alle costis. 9 Also thou hast ful many crafti men, masouns, and leggeris of stonys, and crafti men of trees, and of alle craftis, 10 most prudent to make werk, in gold, and siluer, and bras, and in yrun, of which is no noumbre; therfor rise thou, and make, and the Lord schal be with thee. 11 Also Dauid comaundide to alle the princis of Israel, that thei schulden helpe Salomon, 12 his sone, and seide, Ye seen, that youre Lord God is with you, and hath youe to you reste by cumpas, and hath bitake alle enemyes in youre hoond, and the erthe is suget bifor the Lord, and bifor his puple. 13 Therfor yyue youre hertis and youre soulis, that ye seke youre Lord God; and rise ye togidere, and bilde ye a seyntuarie to youre Lord God, that the arke of boond of pees of the Lord be brouyt in, and that vessels halewid to the Lord be brouyt in to the hows, which is bildid to the name of the Lord. 15 Therfor Dauid was eld and ful of daies, and ordeynede Salomon, his sone, kyng on Israel. 16 And he gaderide togidere alle the princes of Israel, and the preestis, and dekenes; 17 and the dekenes weren noumbrid fro twenti yeer and aboue, and eiyte and thretti thousynde of men weren foundun. 18 And foure and twenty thousynde men weren chosun of hem, and weren departid in to the seruyce of the hows of the Lord; sotheli of souereyns, and iugis, sixe thousynde; 19 forsothe foure thousynde porteris weren, and so many syngeris, syngynge to the Lord in orguns, whiche Dauid hadde maad for to synge.