1 John 4

¹ We ben of God; he that knowith God, herith vs; he that is not of God, herith not vs. In this thing we knowen the spirit of treuthe, and the spirit of errour. ² Moost dere britheren, loue we togidere, for charite is of God; and ech that loueth his brother, is borun of God, and knowith God. ³ He that loueth not, knowith not God; for God is charite. ⁴ In this thing the charite of God apperide in vs, for God sente hise oon bigetun sone in to the world, that we lyue bi hym. ⁵ In this thing is charite, not as we hadden loued God, but for he firste louede vs, and sente hise sone foryyuenesse for oure synnes. ⁶ Ye moost dere britheren, if God louede vs, we owen to loue ech other. ⁷ No man say euer God; if we louen togidre, God dwellith in vs, and the charite of hym is perfit in vs. ⁸ In this thing we knowen, that we dwellen in hym, and he in vs; for of his spirit he yaf to vs. ⁹ And we sayen, and witnessen, that the fadir sente his sone sauyour of the world. ¹⁰ Who euer knowlechith, that Jhesu is the sone of God, God dwellith in him, and he in God. ¹¹ And we han knowun, and bileuen to the charite, that God hath in vs. God is charite, and he that dwellith in charite, dwellith in God, and God in hym. ¹² In this thing is the perfit charite of God with vs, that we haue trist in the dai of dom; for as he is, also we ben in this world. ¹³ Drede is not in charite, but perfit charite puttith out drede; for drede hath peyne. But he that dredith, is not perfit in charite. ¹⁴ Therfor loue we God, for he louede vs bifore. ¹⁵ If ony man seith, that `Y loue God, and hatith his brother, he is a liere. For he that loueth not his brothir, which he seeth, hou mai he loue God, whom he seeth not? ¹⁶ And we han this comaundement of God, that he that loueth God, loue also his brothir. ¹⁸ Ech man that bileueth that Jhesus is Crist, is borun of God; and ech man that loueth hym that gendride, loueth hym that is borun of hym. ¹⁹ In this thing we knowen, that we louen the children of God, whanne we louen God, and don his maundementis. ²⁰ For this is the charite of God, that we kepe hise maundementis; and his maundementis ben not heuy. ²¹ For al thing that is borun of God, ouercometh the world; and this is the victorie that ouercometh the world, oure feith.