1 Timothy 4

¹ Thou puttynge forth these thingis to britheren, schalt be a good mynystre of Crist Jhesu; nurschid with wordis of feith and of good doctryne, which thou hast gete. ² But eschewe thou vncouenable fablis, and elde wymmenus fablis; haunte thi silf to pitee. ³ For bodili exercitation is profitable to litle thing; but pitee is profitable to alle thingis, that hath a biheest of lijf that now is, and that is to come. ⁴ A trewe word, and worthi al acceptacioun. ⁵ And in this thing we trauelen, and ben cursid, for we hopen in lyuyng God, that is sauyour of alle men, moost of feithful men. ⁶ Comaunde thou this thing, and teche. ⁷ No man dispise thi yongthe, but be thou ensaumple of feithful men in word, in lyuyng, in charite, in feith, in chastite. ⁸ Tyl Y come, take tent to redyng, to exortacioun and teching. ⁹ Nyle thou litil charge the grace which is in thee, that is youun to thee bi profecie, with putting on of the hondis of preesthod. ¹⁰ Thenke thou these thingis, in these be thou, that thi profiting be schewid to alle men. ¹¹ Take tent to thi silf and to doctryn; be bisi in hem. For thou doynge these thingis, schalt `make bothe thi silf saaf, and hem that heren thee. ¹³ Blame thou not an eldere man, but biseche as a fadir, yonge men as britheren; elde wymmen as modris, ¹⁴ yonge wymmen as sistris, in al chastite. ¹⁵ Honoure thou widewis, that ben very widewis. ¹⁶ But if ony widewe hath children of sones, lerne sche first to gouerne her hous, and quyte to fadir and modir; for this thing is acceptid bifor God.