2 Corinthians 2

¹ For if ony man hath maad me soreuful, he hath not maad me sorewful but a parti, that Y charge not you alle. ² This blamyng that ys maad of manye, suffisith to hym, that is sich oon; ³ so that ayenward ye rathir foryyuen and coumfort, lest perauenture he that is suche a maner man, be sopun vp bi more grete heuynesse. ⁴ For which thing Y biseche you, that ye conferme charite in to hym. ⁵ For whi therfor Y wroot this, that Y knowe youre preuyng, whether in alle thingis ye ben obedient. ⁶ For to whom ye han foryyuen ony thing, also Y haue foryyue. For Y that that Y foryaf, yif Y foryaf ony thing, haue youun for you in the persone of Crist, ⁷ that we be not disseyued of Sathanas; for we knowen hise thouytis. ⁸ But whanne Y was comun to Troade for the gospel of Crist, and a dore was opened to me in the Lord, ⁹ Y hadde not rest to my spirit, for Y foond not my brother Tite, but Y seide to hem farewel, and Y passide in to Macedonye. ¹⁰ And Y do thankyngis to God, that euere more makith vs to haue victorie in Crist Jhesu, and schewith bi vs the odour of his knowing in ech place; ¹¹ for we ben the good odour of Crist to God, among these that ben maad saaf, and among these that perischen. ¹² To othere sotheli odour of deth in to deth, but to othere we ben odour of lijf in to lijf. And to these thingis who is so able? ¹³ For we ben not as many, that don auoutrie bi the word of God, but we speken of clennesse, as of God, bifor God in Crist. ¹⁵ Bigynnen we therfor eftsoone to preise vs silf? or whether we neden, as summen, pistlis of preisinge to you, or of you? ¹⁶ Ye ben oure pistle, writun in oure hertis, which is knowun and red of alle men, ¹⁷ and maad opyn, for ye ben the pistle of Crist mynystrid of vs, and writun, not with enke, but bi the spirit of the lyuynge God; not in stony tablis, but in fleischli tablis of herte.