2 Samuel 1

¹ And the yong man seide, that telde to hym, Bi hap Y cam in to the hil of Gelboe, and Saul lenyde on his spere; forsothe charis and knyytis neiyiden to hym; ² and he turnede bihynde his bak, and siy me, and clepide. To whom whanne Y hadde answeride, Y am present; he seide to me, Who art thou? 3 And Y seide to hym, Y am a man of Amalech. 4 And he spak to me, Stonde thou on me, and sle me; for angwischis holden me, and yit al my lijf is in me. 5 And Y stood on hym, and Y killide hym; for Y wiste that he myyte not lyue aftir the fallyng; and Y took the diademe, that was in his heed, and the bye fro his arm, and Y brouyte hidur to thee, my lord. 6 Forsothe Dauid took and to-rente hise clothis, and the men that weren with hym; 7 and thei weiliden, and wepten, and fastiden til to euentid, on Saul, and Jonathas, his sone, and on the puple of the Lord, and on the hows of Israel, for thei hadden feld bi swerd. ⁸ And Dauid seide to the yong man, that telde to him, Of whennus art thou? And he answeride, Y am the sone of a man comelyng, of a man of Amalech. ⁹ And Dauid seide to him, Whi dreddist thou not to sende thine hond, that thou schuldist sle the crist of the Lord? ¹⁰ And Dauid clepide oon of hise children, and seide, Go thou, and falle on hym. Which smoot that yong man, and he was deed. ¹¹ And Dauid seide to hym, Thi blood be on thin heed; for thi mouth spak ayens thee, and seide, Y killide the crist of the Lord. ¹² Forsooth Dauid biweilide sych a weilyng on Saul, and on Jonathas, his sone; ¹³ and comaundide, that thei schulden teche the sones of Juda weilyng, as it is writun in the Book of Just Men. And Dauid seyde, Israel, biholde thou, for these men that ben deed, woundid on thin hiye placis; ¹⁴ the noble men of Israel ben slayn on thin hillis. ¹⁵ Hou felden stronge men? nyle ye telle in Geth, nether telle ye in the weilottis of Ascolon; lest perauenture the douytris of Filisteis be glad, lest the douytris of vncircumcidid men be glad. 16 Hillis of Gelboe, neither dew nethir reyn come on you, nether the feeldis of firste fruytis be; for the scheeld of stronge men was cast awey there, the scheeld of Saul, as if he were not anoyntid with oile. ¹⁷ Of the blood of slayn men, of the fatnesse of strong men, the arewe of Jonathas yede neuer abak, and the swerd of Saul turnede not ayen void. ¹⁸ Saul and Jonathas amyable, and fair in her lijf, weren not departid also in deeth; thei weren swiftere than eglis, strongere than liouns. ¹⁹ Douytris of Israel, wepe ye on Saul, that clothide you with fyn reed colourid in delicis, that yaf goldun ournementis to youre atyre. ²⁰ Hou felden doun stronge men in batel? 21 Jonathas was slayn in the hiye places. Y make sorewe on thee, my brother Jonathas, ful fair, and amyable more than the loue of wymmen; as a modir loueth oon aloone sone, so Y louyde thee. ²² Hou therfor `felden doun stronge men, and armeris of batel perischide? ²⁴ Therfor aftir these thingis Dauid counseilide the Lord, and seide, Whether Y schal stie in to oon of the citees of Juda? And the Lord seide to hym, Stie thou. And Dauid seide to the Lord, Whidur schal Y stie? And the Lord answeride to hym, In to Ebron. ²⁵ Therfor Dauid stiede, and hise twei wyues, Achynoem of Jezrael, and Abigail, the wijf of Nabal of Carmele. ²⁶ But also Dauid ledde the men that weren with hym, ech man with his hows; and thei dwelliden in the townes of Ebron. ²⁷ And the men of Juda camen, and anoyntiden there Dauid, that he schulde regne on the hows of Juda. And it was teld to Dauid, that men of Jabes of Galaad hadden biried Saul.