2 Timothy 1

¹ For which cause Y moneste thee, that thou reise ayen the grace of God, that is in thee bi the settyng on of myn hondis. ² For whi God yaf not to vs the spirit of drede, but of vertu, and of loue, and of sobrenesse. ³ Therfor nyl thou schame the witnessyng of oure Lord Jhesu Crist, nether me, his prisoner; but trauele thou togidere in the gospel bi the vertu of God; ⁴ that delyueride vs, and clepide with his hooli clepyng, not after oure werkis, but bi his purpos and grace, that is youun in Crist Jhesu bifore worldli tymes; ⁵ but now it is opyn bi the liytnyng of oure sauyour Jhesu Crist, which destriede deth, and liytnede lijf and vncorrupcioun bi the gospel. ⁶ In which Y am set a prechour and apostle, and maistir of hethene men. ⁷ For which cause also Y suffre these thingis; but Y am not confoundid. For Y woot to whom Y haue bileuyd, and Y am certeyne that he is miyti for to kepe that is take to my keping in to that dai. ⁸ Haue thou the fourme of hoolsum wordis, whiche thou herdist of me in feith and loue in Crist Jhesu. ⁹ Kepe thou the good takun to thi kepyng bi the Hooli Goost, that dwellith in vs. ¹⁰ Thou wost this, that alle that ben in Asie ben turnyd awey fro me, of whiche is Figelus and Ermogenes. ¹¹ The Lord yyue merci to the hous of Onesyforus, for ofte he refreischide me, and schamyde not my chayne. ¹² But whanne he cam to Rome, he souyte me bisili, and foond. ¹³ The Lord yyue to hym to fynde merci of God in that dai. And hou grete thingis he mynystride to me at Effesi, thou knowist betere. ¹⁵ Therfor thou, my sone, be coumfortid in grace that is in Crist Jhesu. ¹⁶ And what thingis thou hast herd of me bi many witnessis, bitake thou these to feithful men, whiche schulen `be also able to teche othere men. ¹⁷ Trauele thou as a good knyyt of Crist Jhesu. ¹⁸ No man holdinge knyythod to God, wlappith hym silf with worldli nedis, that he plese to hym, to whom he hath preuyd hym silf.