Ezekiel 6

¹ He. He fillide me with bitternesses; he gretli fillide me with wermod. ² Vau. He brak at noumbre my teeth; he fedde me with aische. ³ Vau. And my soule is putte awei; Y haue foryete goodis. ⁴ Vau. And Y seide, Myn ende perischide, and myn hope fro the Lord. ⁵ Zai. Haue thou mynde on my pouert and goyng ouer, and on wermod and galle. ⁶ Zai. Bi mynde Y schal be myndeful; and my soule schal faile in me. ⁷ Zai. Y bithenkynge these thingis in myn herte, schal hope in God. ⁸ Heth. The mercies of the Lord ben manye, for we ben not wastid; for whi hise merciful doyngis failiden not. ⁹ Heth. Y knew in the morewtid; thi feith is miche. ¹⁰ Heth. My soule seide, The Lord is my part; therfor Y schal abide hym. ¹¹ Teth. The Lord is good to hem that hopen in to hym, to a soule sekynge hym. ¹² Teth. It is good to abide with stilnesse the helthe of God. ¹³ Teth. It is good to a man, whanne he hath bore the yok fro his yongthe. ¹⁴ Joth. He schal sitte aloone, and he schal be stille; for he reiside hym silf aboue hym silf.