Galatians 5

¹ For in Jhesu Crist nether circumcisioun is ony thing worth, nether prepucie, but the bileue that worchith bi charite. ² Ye runnen wel; who lettide you that ye obeyede not to treuthe? ³ Consente ye to no man; for this counsel ys not of hym that hath clepid you. ⁴ A litil souredowy apeirith al the gobet. ⁵ I trust on you in oure Lord, that ye schulden vndurstonde noon other thing. And who that disturblith you, schal bere dom, who euere he be. ⁶ And, britheren, if Y preche yit circumcisioun, what suffre Y yit persecucioun? thanne the sclaundre of the crosse is auoidid. ⁷ Y wolde that thei weren cut awei, that disturblen you. ⁸ For, britheren, ye ben clepid in to fredom; oneli yyue ye not fredom in to occasioun of fleisch, but bi charite of spirit serue ye togidere. ⁹ For euery lawe is fulfillid in o word, Thou schalt loue thi neiybore as thi silf. ¹⁰ And if ye bite, and ete ech othere, se ye, lest ye be wastid ech fro othere. ¹¹ And Y seie you in Crist, walke ye in spirit, and ye schulen not performe the desiris of the fleisch. ¹² For the fleisch coueitith ayens the spirit, and the spirit ayen the fleisch; for these ben aduersaries togidere, that ye don not alle thingis that ye wolen. ¹³ That if ye be led bi spirit, ye ben not vnder the lawe. ¹⁴ And werkis of the fleisch ben opyn, whiche ben fornicacioun, vnclennes, vnchastite, letcherie, seruice of false goddis, ¹⁵ witchecraftis, enmytees, striuyngis, indignaciouns, wraththis, chidingis, discenciouns, sectis, enuyes, ¹⁶ manslauytris, dronkennessis, vnmesurable etyngis, and thingis lijk to these, whiche Y seie to you, as Y haue told to you `to fore, for thei that doon suche thingis, schulen not haue the kyngdom of God. ¹⁷ But the fruyt of the spirit is charite, ioye, pees, pacience, long abidyng, ¹⁸ benygnyte, goodnesse, myldenesse, feith, temperaunce, contynence, chastite; ayen suche thingis is no lawe. ¹⁹ And they that ben of Crist, han crucified her fleisch with vices and coueytyngis. ²⁰ If we lyuen bi spirit, walke we bi spirit; be we not made coueytouse of veyn glorie, stirynge ech othere to wraththe, or hauynge enuye ech to othere. ²³ Britheren, if a man be occupied in ony gilt, ye that ben spiritual, enforme ye such oon in spirit of softnesse, biholdinge thi silf, lest that thou be temptid. ²⁴ Ech bere othere chargis, and so ye schulen fulfille the lawe of Crist. ²⁵ For who that trowith that he be ouyt, whanne he is nouyt, he bigilith him silf. ²⁶ But ech man preue his owne werk, and so he schal haue glorie in him silf, and not in an othere.