Hebrews 1

¹ And whanne eftsoone he bryngith in the firste bigetun sone in to the world, he seith, And alle the aungels of God worschipe hym. ² But he seith to aungels, He that makith hise aungels spiritis, and hise mynystris flawme of fier. ³ But to the sone he seith, God, thi trone is in to the world of world; a yerde of equite is the yerde of thi rewme; ⁴ thou hast louyd riytwisnesse, and hatidist wickidnesse; therfor the God, thi God, anoyntide thee with oile of ioye, more than thi felowis. ⁵ And, Thou, Lord, in the bigynnyng foundidist the erthe, and heuenes ben werkis of thin hondis; thei schulen perische, ⁶ but thou schalt perfitli dwelle; and alle schulen wexe elde as a cloth, and thou schalt chaunge hem as a cloth, ⁷ and thei schulen be chaungid. But thou art the same thi silf, and thi yeeris schulen not faile. ⁸ But to whiche of the aungels seide God at ony tyme, Sitte thou on my riythalf, till Y putte thin enemyes a stool of thi feet? ⁹ Whether thei alle ben not seruynge spiritis, sente to seruen for hem that taken the eritage of heelthe? ¹¹ Therfor more plenteuousli it bihoueth vs to kepe tho thingis, that we han herd, lest perauenture we fleten awei. ¹² For if the ilke word that was seid bi aungels, was maad sad, and ech brekyng of the lawe and vnobedience took iust retribucioun of meede, ¹³ hou schulen we ascape, if we despisen so greet an heelthe? Which, whanne it hadde takun bigynnyng to be teld out by the Lord, of hem that herden is confermyd in to vs. ¹⁴ For God witnesside to gidere bi myraclis, and wondris, and grete merueilis, and dyuerse vertues, and departyngis of the Hooli Goost, bi his wille.