Hebrews 4

¹ Therfor for it sueth, that summen schulen entre in to it, and thei to whiche it was teld to bifor, entriden not for her vnbileue. ² Eftsoone he termyneth sum dai, and seith in Dauith, To dai, aftir so myche tyme of tyme, as it is biforseid, To dai if ye han herd his vois, nyle ye hardne youre hertis. ³ For if Jhesus hadde youun reste to hem, he schulde neuere speke of othere aftir this dai. ⁴ Therfor the sabat is left to the puple of God. ⁵ For he that is entrid in to his reste, restide of hise werkis, as also God of hise. ⁶ Therfor haste we to entre in to that reste, that no man falle in to the same ensaumple of vnbileue. For the word of God is quyk, ⁷ and spedi in worching, and more able to perse than any tweyne eggid swerd, and stretchith forth to the departynge of the soule and of the spirit, and of the ioynturis and merewis, and demere of thouytis, and of intentis and hertis. ⁸ And no creature is vnuisible in the siyt of God. For alle thingis ben nakid and opyn to hise iyen, to whom a word to vs. ⁹ Therfor we that han a greet bischop, that perside heuenes, Jhesu, the sone of God, holde we the knoulechyng of oure hope. ¹⁰ For we han not a bischop, that may not haue compassioun on oure infirmytees, but was temptid bi alle thingis bi lycnesse, with oute synne. ¹¹ Therfor go we with trist to the trone of his grace, that we gete merci, and fynde grace in couenable help. ¹³ For ech bischop takun of men, is ordeyned for men in these thingis `that ben to God, that he offre yiftis and sacrifices for synnes. ¹⁴ Which may togidere sorewe with hem, that beth vnkunnynge and erren; for also he is enuyrounned with infirmytee. ¹⁵ And therfor he owith, as for the puple, so also for hym silf, to offre for synnes. ¹⁶ Nethir ony man taketh to hym onour, but he that is clepid of God, as Aaron was.