Hosea 11

¹ and thou hast bitake vs in the hondis of enemyes, wickid men, and worst trespassouris, and to the vniust kyng, and worst ouer al erthe. ² And now we moun not opene the mouth; we ben maad schame and schenschipe to thi seruauntis, and to hem that worschipen thee. ³ We bisechen, yyue thou not vs to enemyes with outen ende, for thi name, and distrie thou not thi testament, ⁴ and take thou not awei thi merci fro vs, for Abraham, thi derlyng, and Ysaac, thi seruaunt, and Israel, thin hooli; ⁵ to whiche thou spakist, biheetyng that thou schuldist multiplie her seed as the sterris of heuene, and as grauel which is in the brynke of the see. ⁶ For whi, Lord, we ben maad litle, more than alle folkis, and we ben lowe in al erthe to dai, for oure synnes. ⁷ And in this tyme is no prince, and duyk, and profete, nether brent sacrifice, nether sacrifice, nether offryng, nether encense, nether place of firste fruytis bifor thee, ⁸ that we moun fynde thi mercy; but be we resseyued in contrit soule, and in spirit of mekenesse. ⁹ As in brent sacrifice of rammes, and of bolis, and as in thousyndis of fatte lambren, so oure sacrifice be maad to dai in thi siyt, that it plese thee; for no schame is to hem that tristen in thee. ¹⁰ And now we suen thee in al the herte, and we dreden thee, and we seken thi face. ¹¹ Schende thou not vs, but do with vs bi thi myldenesse, and bi the multitude of thi merci. ¹² And delyuere thou vs in thy merueils, and yyue thou glorie to thi name, Lord;