Isaiah 11

¹ He made redi his breed in the firste thingis, in to fulnesse; for whi and thei shulen ete the sacrifices of the Lord, whiche he yaf to hym, and to his seed. ² But in the lond of his folk he schal not haue eritage, and no part is to hym among the folk; for whi God is the part and eritage of hym. ³ Fynees, the sone of Eleazarus, was the thridde in glorie, in suynge hym in the drede of God, ⁴ and to stonde in the reuerence of folk; in the goodnesse and gladnesse of his soule he pleside God of Israel. ⁵ Therfor God ordeynede to hym the testament of pees, and made hym prince of hooli men, and of his folk; that the dignete of presthod be to hym and to his seed, with outen ende. ⁶ And the testament of Dauid, the sone of Jesse, of the lynage of Juda, was eritage to hym, and to his seed; that he schulde yyue wisdom in to oure herte, to deme his folk in riytfulnesse, lest her goodis schulen be don awei; and he made the glorie of hem to be euerlastinge, in the folk of hem. ⁸ Jhesus Naue, the successour of Moises in profetis, was strong in batel, that was greet bi his name. ⁹ The gretteste in to the helthe of chosun men of God, to ouercome enemyes risynge ayens hem, that he schulde gete the erytage of Israel. ¹⁰ Which glorie he gat in reysynge his hondis, and in castynge scharpe arowis ayens citees. ¹¹ Who bifore hym ayenstood so? for whi the Lord hym silf smoot the enemyes. ¹² Whether the sunne was not lettid in the wrathfulnesse of hym, and o dai was maad as tweyne? ¹³ He clepide to help the hiyeste God, myyti in ouercomynge enemyes on ech side; and God, greet and hooli, herde hym, in stoonys of hail of ful greet vertu. ¹⁴ He made asauyt ayens the folk enemy, and in the comynge doun he loste the aduersaries; ¹⁵ that hethene men knowe the myyt of hym, for it is not esy to fiyte ayens the Lord; and he suede myyti men at the bak. ¹⁶ And in the daies of Moises he and Caleph, the sone of Jephone, diden merci; to stonde ayens the enemye, and to forbede the folk fro synnes, and to refreyne the grutchyng of malice.