Isaiah 14

¹ And thou, Salomon, fillidist derk figuratif spechis in licnessis; and thi name was pupplischid to ilis afer, and thou were louyde in thi pees. ² Londis wondriden in songis, and in prouerbis, and in licnessis, and interpretyngis, ether exposiciouns; and in the name of the Lord, ³ to whom the surname is God of Israel. ⁴ Thou gaderidist togidere gold as latoun, and thou fillidist siluer as leed. ⁵ And thou bouwidist thi thies to wymmen; thou haddist power in thi bodi. ⁶ Thou hast youe a wem in thi glorie, and madist vnhooli thi seed, to brynge in wrathfulnesse to thi children, and thi foli in othere men; ⁷ that thou schuldist make the rewme departid in to tweyne, and of Effrem to comaunde an hard comaundement. ⁸ But God schal not forsake his merci, and schal not distrie, nether do awei hise werkis, nether he schal leese fro generacioun the sones sones of his chosun kyng Dauid; and he schal not distrie the seed of hym that loueth the Lord. ⁹ Forsothe God yaf remenaunt to Jacob, and to Dauid of that generacioun. ¹⁰ And Salomon hadde an ende with hise fadris. ¹¹ And he lefte aftir hym of his seed Roboam, ¹² the foli of the folk, and made lesse fro prudence; which Roboam turnede awei the folk bi his councel. ¹³ And Jeroboam, the sone of Nabath, that made Israel to do synne, and yaf to Effraym weie to do synne; and ful many synnes of hem weren plenteuouse, ¹⁴ for thei turneden hem awei greetli fro her lond. ¹⁵ And the lynage of Effraym souyte al wickidnessis, til defence cam to hem; and delyuerede hem fro alle synnes. ¹⁷ And Elie, the profete, roos as fier; for whi his word brente as a brond. ¹⁸ Which brouyte yn hungur on hem, and thei suynge hym weren maad fewe for enuye; for thei myyten not suffre the comaundementis of the Lord. ¹⁹ Bi the word of the Lord he held togidere heuene, and castide doun fro it fier to the erthe. ²⁰ So Elie was alargid in his merueils; and who may haue glorie in lijk maner with thee, which tokist awei a deed man fro hellis, ²¹ fro the eritage of deth, in the word of the Lord God? ²² Which castidist doun kyngis to deth, and hast broke togidere liytli the power of hem, and gloriouse men fro her bed. ²³ Which herdist dom in Syna, and in Oreb domes of defence. ²⁴ Which anoyntist kyngis to penaunce, and makist prophetis successouris aftir thee. ²⁵ Which were reseyued in a whirlwynde of fier, in a chare of horsis of fier. ²⁶ Which art writun in the domes of tymes, to plese the wrathfulnesse of the Lord, to recounsele the herte of the fadir to the sone, and to restore the lynagis of Jacob. ²⁷ Thei ben blessid, that siyen thee, and weren maad feir in thi frenschipe; ²⁸ for whi we lyuen oneli in lijf, but after deth oure name schal not be siche. ²⁹ Elie, that was hilid in a whirlewynd; and his spirit was fillid in Elisee. Elisee in hise daies dredde not the prince, and no man ouercam hym bi power; ³⁰ nether ony word ouercam hym, and his deed bodi profesiede. ³¹ In his lijf he dide wondris ayens kynde; and in deth he wrouyte merueilis. ³² In alle these thingis the puple dide not penaunce, and yeden not awei fro her synnes, til whanne thei weren cast awei fro her lond, and weren scatered in to ech lond.