Isaiah 2

¹ If his name dwellith, he schal leeue more than a thousynde; and if he restith, it schal profite to hym. ² Yit Y schal take councel to telle out, for Y am fillid as with woodnesse; ³ and myn ynnere spirit seith in vois, Ye fruytis of God, here me, and make ye fruyt, as roosis plauntide on the ryuers of watris. ⁴ Haue ye odour of swetnesse, as the Liban hath. ⁵ Bringe forth flouris, as a lilee; yyue ye odour, and make ye boowis in to grace. And preise ye togidere a song; and blesse ye the Lord in hise werkis. ⁶ Yyue ye greet onour to his name, and knouleche ye to him in the vois of youre lippis, in songis of lippis, and in harpis; and thus ye schulen seie in knouleching, ⁷ Alle the werkis of the Lord ben ful goode. ⁸ Forsothe watir as an heepe of stoonys stood at his word; and as resettis of watris in the word of his mouth. ⁹ For whi pesiblenesse is maad in his comaundement; and no defaute is in the heelthe of hym. ¹⁰ The werkis of ech fleisch ben bifore hym; and no thing is hid fro hise iyen. ¹¹ He biholdith fro the world til in to the world; and no thing is wondurful in his siyt. ¹² It is not to seie, What is this thing, ether, What is that thing? for whi alle thingis schulen be souyt in her tyme. ¹³ The blessyng of hym schal flowe as a flood; ¹⁴ and as the grete flood fillide greteli the erthe, so his yre schal enherite in folkis, that souyten not hym. ¹⁵ As he turnede watris in to drynessis, and the erthe was dried, and hise weies weren dressid to the weies of hem; so offenciouns in his ire ben dressid to synneris. ¹⁶ Goode thingis weren maad at the bigynnyng to goode men; so goode thingis and yuele ben maad to worste men. ¹⁷ The bigynnyng of nedeful thing to the lijf of men, watir, fier, and yrun, and salt, and mylk, and breed of cleene flour of whete, and hony, and a clustre of grape, and oile, and cloth. ¹⁸ Alle these thingis schulen turne to hooli men in to goodis; so and to vnfeithful men and synneris in to yuels. ¹⁹ Spiritis ben that ben maad to veniaunce; and in her woodnesse thei confermyden her turmentis. ²⁰ And in the tyme of endyng thei schulen schede out vertu; and thei schulen confounde the strong veniaunce of hym that made hem. ²¹ Fier, hail, hungur, and deth; alle these thingis ben maad to veniaunce; the teeth of beestis, ²² and scorpiouns, and serpentis, and a swerd punyschynge wickid men in to destriyng.