Isaiah 21

¹ Whanne yit Y was yongere, bifore that Y erride, Y souyte wisdom opynli in my preier. ² Bifore the tyme of eelde Y axide for it, and `til in to the laste thingis Y schal enquere it; and it schal flour as a grape ripe bifore othere. ³ Myn herte was glad ther ynne, my foot yede a riytful weye; fro my yongthe Y souyte it. ⁴ Y bowide doun a litil myn eere, and Y took it. ⁵ Y foonde myche wisdom in my silf, and Y profitide myche ther ynne. ⁶ Y schal yyue glorie to hym, that yyueth wisdom to me. ⁷ For whi Y took councel to do it; Y loued feruentli good, and Y schal not be schent. ⁸ My soule wrastlide togidere ther ynne; and Y was confermyd in doynge it. ⁹ Y stretchide forth myn hondis an hiy; and my soule schynede in the wisdom of hym, and he liytnyde myn vnkunnyngis. ¹⁰ Y dresside my soule to it; and Y foond it in knowyng. ¹¹ Y hadde pesibli fro the bigynnyng an herte with tho; for this thing Y schal not be forsakun. ¹² My soule was disturblid in sekynge it; therfor Y schal haue pesibli a good possessioun. ¹³ For whi the Lord yaf to me a tunge my meede; and in it Y schal preise hym. ¹⁴ Ye vntauyt men, neiye to me; and gadere ye you in to the hous of techyng. ¹⁵ What tarien ye yit? and what seien ye in these thingis? youre soules thristen greetli. ¹⁶ Y openyde my mouth, and Y spak, Bie ye wisdom to you with out siluer, ¹⁷ and make youre necke suget to the yok therof, and youre soule resseyue techyng; for whi it is in the nexte to fynde it.