Isaiah 27

¹ Wo to you that risen togidere eerli to sue drunkennesse, and to drinke `til to euentid, that ye brenne with wyn. ² Harpe, and giterne, and tympan, and pipe, and wyn ben in youre feestis; and ye biholden not the werk of the Lord, nether ye biholden the werkis of hise hondis. ³ Therfor my puple is led prisoner, for it hadde not kunnyng; and the noble men therof perischiden in hungur, and the multitude therof was drye in thirst. ⁴ Therfor helle alargide his soule, and openyde his mouth with outen ony ende; and strong men therof, and the puple therof, and the hiy men, and gloriouse men therof, schulen go doun to it. ⁵ And a man schal be bowid doun, and a man of age schal be maad low; and the iyen of hiy men schulen be pressid doun. ⁶ And the Lord of oostis schal be enhaunsid in doom, and hooli God schal be halewid in riytfulnesse. ⁷ And lambren schulen be fed bi her ordre, and comelyngis schulen ete desert places turned in to plentee. ⁸ Wo to you that drawen wickydnesse in the cordis of vanyte, and drawen synne as the boond of a wayn; and ye seien, ⁹ The werk of hym haaste, and come soone, that we se; and the counsel of the hooli of Israel neiy, and come, and we schulen knowe it. ¹⁰ Wo to you that seien yuel good, and good yuel; and putten derknessis liyt, and liyt derknessis; and putten bittir thing in to swete, and swete thing in to bittir. ¹¹ Wo to you that ben wise men in youre iyen, and ben prudent bifor you silf. ¹² Wo to you that ben myyti to drynke wyn, and ben stronge to meddle drunkenesse; ¹³ and ye iustifien a wickid man for yiftis, and ye taken awei the riytfulnesse of a iust man fro hym.