Isaiah 32

¹ For he schal seie, Whether my princes ben not kyngis to gidere? ² Whether not as Carcamys, so Calanno; and as Arphat, so Emath? whether not as Damask, so Samarie? ³ As myn hond foond the rewmes of idol, so and the symylacris of hem of Jerusalem and of Samarie. ⁴ Whether not as Y dide to Samarie, and to the idols therof, so Y schal do to Jerusalem, and to the simylacris therof? ⁵ And it schal be, whanne the Lord hath fillid alle hise werkis in the hil of Syon and in Jerusalem, Y schal visite on the fruit of the greet doynge herte of the kyng of Assur, and on the glorie of the hiynesse of hise iyen. ⁶ For he seide, Y haue do in the strengthe of myn honde, and Y haue understonde in my wisdom; and Y haue take awei the endis of peplis, and Y haue robbid the princes of them, and Y as a myyti man haue drawun doun them that saten an hiy. ⁷ And myn hond foond the strengthe of puplis as a nest, and as eirun ben gaderid togidere that ben forsakun, so Y gaderid togidere al erthe; and noon was that mouyde a fethere, and openyde the mouth, and grutchide. ⁸ Whether an ax schal haue glorie ayens hym that kittith with it? ether a sawe schal be enhaunsid ayens hym of whom it is drawun? as if a yerde is reisid ayens hym that reisith it, and a staf is enhaunsid, which sotheli is a tre. ⁹ For this thing the lordli gouernour, Lord of oostis, schal sende thinnesse in the fatte men of hym, and his glorie kyndlid vndur schal brenne as the brenning of fier.</span> <span class="verse" data-verse="10"><sup>10</sup> And the liyt of Israel schal be in fier, and the hooli of it in flawme; and the thorn of him and brere schal be kyndlid and deuourid in o dai.</span> <span class="verse" data-verse="11"><sup>11</sup> And the glorie of his forest and of his Carmele schal be wastid, fro the soule til to fleisch; and he schal be fleynge awei for drede. ¹² And the relifs of the tree of his forest schulen be noumbrid for fewnesse, and a child schal write hem. ¹³ And it schal be in that dai, the remenaunt of Israel, and thei that fledden of the house of Jacob, schal not adde for to triste on hym that smytith hem; but it schal triste on the hooli Lord of Israel, in treuthe. ¹⁴ The relifs, Y seie, the relifs of Jacob, schulen be conuertid to the stronge Lord. ¹⁵ Forwhi, Israel, if thi puple is as the grauel of the see, the relifs schulen be turned therof; an endyng maad schort schal make riytfulnesse to be plenteuouse. ¹⁶ For whi the Lord God of oostis schal make an endyng and a breggyng in the myddis of al erthe. ¹⁷ For this thing the Lord God of oostis seith these thingis, My puple, the dwellere of Sion, nyle thou drede of Assur, for he schal smite thee in a yerde, and he schal reise his staf on thee in the weie of Egipt. ¹⁸ Forwhi yit a litil, and a litil, and myn indignacioun and my strong veniaunce schal be endid on the greet trespas of hem. ¹⁹ And the Lord of oostis schal reise a scourge on hym bi the veniaunce of Madian in the stoon of Oreb, and bi his yerde on the see; and he schal reise that yerde in the wei of Egipt. ²⁰ And it schal be in that dai, his birthun schal be takun awei fro thi schuldre, and his yok fro thi necke; and the yok schal wexe rotun fro the face of oile.