Isaiah 50

¹ And Assur schal falle bi swerd, not of man, and a swerd, not of man, schal deuoure hym; and he schal fle, not fro the face of swerd, and hise yonge men schulen be tributaries; ² and the strengthe of hym schal passe fro ferdfulnesse, and hise princes fleynge schulen drede. The Lord seide, whos fier is in Sion, and his chymeney is in Jerusalem. ⁴ Lo! the kyng schal regne in riytfulnesse, and princes schulen be souereyns in doom. ⁵ And a man schal be, as he that is hid fro wynd, and hidith hym silf fro tempest; as stremes of watris in thirst, and the schadewe of a stoon stondynge fer out in a desert lond. ⁶ The iyen of profetis schulen not dasewe, and the eeris of heereris schulen herke diligentli; ⁷ and the herte of foolis schal vndurstonde kunnyng, and the tunge of stuttynge men schal speke swiftli, and pleynli. ⁸ He that is vnwijs, schal no more be clepid prince, and a gileful man schal not be clepid the grettere. ⁹ Forsothe a fool shal speke foli thingis, and his herte schal do wickidnesse, that he performe feynyng, and speke to the Lord gilefuli; and he schal make voide the soule of an hungry man, and schal take awei drynke fro a thirsti man. ¹⁰ The vessels of a gileful man ben worste; for he schal make redi thouytis to leese mylde men in the word of a leesyng, whanne a pore man spak doom. ¹¹ Forsothe a prince schal thenke tho thingis that ben worthi to a prince, and he schal stonde ouer duykis.