Isaiah 6

¹ Be thou war of frendis, of the wordis of vpbreidyng; and whanne thou hast youe, vpbreide thou not. ³ Double thou not a word of heryng, of the schewyng of an hid word; and thou schalt be verily with out schame, and thou schalt fynde grace in the siyt of alle men. Be thou not schent for alle these thingis; and take thou not a persoone, that thou do trespas. ⁴ Be thou war of the lawe and testament of the hiyeste, of doom to iustifie a wickid man; ⁵ of the word of felowis, and of weigoeris, and of the yyuyng of eritage of frendis; ⁶ of the euennesse of balaunce, and of weiytis, of the getyng of many thingis, and of fewe thingis; ⁷ of corrupcioun of biyng, and of marchauntis, and of myche chastising of sones; and of a worste seruaunt, to make the side to bleede. ⁸ A seelyng is good on a wickid man. ⁹ Where ben many hondis, close thou; and what euer thing thou schalt bitake, noumbre thou, and weie thou; forsothe discryue thou, ether write, ech yifte, and takyng. ¹⁰ Absteine thou fro the techyng of an vnwitti man, and fool, and of eldere men that ben demed of yonge men; and thou schalt be lernd in alle thingis, and thou schalt be comendable in the siyt of alle men. ¹¹ An hid douyter of a fadir is wakynge and bisynesse of hym; sche schal take awei sleep; lest perauenture sche be maad auowtresse in hir yong wexynge age, and lest sche dwellynge with the hosebonde, be maad hateful; ¹² lest ony tyme sche be defoulid in hir virginytee, and be foundun with child in the kepyng of hir fadir; leste perauenture sche dwellynge with the hosebonde, do trespasse, ether certis be maad bareyn. ¹³ Ordeyne thou kepyng on a letcherouse douyter, lest ony tyme sche make thee to come in to schenschipe to enemyes, of bacbityng in the citee, and of castyng out of the puple; and sche make thee aschamed in the multitude of puple.