Isaiah 8

¹ Se thou the bouwe, and blesse thou hym that made it; it is ful fair in his schynyng. ² It yede aboute heuene in the cumpas of his glorie; the hondis of hiy God openyden it. ³ Bi his comaundement he hastide the snow; and he hastith to sende out the leiytyngis of his dom. ⁴ Therfor tresouris weren opened, and clowdis fledden out as been. ⁵ In his greetnesse he settide clowdis; and stoonys of hail weren brokun. ⁶ Hillis schulen be moued in his siyt; and the south wynd schal blowe in his wille. ⁷ The vois of his thundur schal beete the erthe; the tempest of the north, and the gaderyng togidere of wynd. ⁸ And as a brid puttynge doun to sitte sprengith snow, and the comyng doun of that snow is as a locust drenchynge doun. ⁹ The iye schal wondre on the fairnesse of whitnesse therof; and an herte dredith on the reyn therof. ¹⁰ He schal schede out frost as salt on the erthe; and while the wynd blowith, it schal be maad as coppis of a brere. ¹¹ The coold northun wynd blew, and cristal of watir frees togidre; it restith, on al the gedering togidere of watris, and it clothith it silf with watris, as with an haburioun. ¹² And it schal deuoure hillis, and it schal brenne the desert; and it schal quenche grene thing as fier. ¹³ The medicyn of alle thingis is in the haasting of a cloude; a deewe, meetynge the heete comynge of brennyng, schal make it low. ¹⁴ The wynd was stille in the word of God; bi his thouyt he made peesible the depthe of watris; and the Lord Jhesu plauntide it. ¹⁵ Thei that seilen in the see, tellen out the perels therof; and we heeringe with oure eeris schulen wondre. ¹⁶ There ben ful cleer werkis, and wonderful, dyuerse kindis of beestis, and of alle litle beestis, and the creature of wondurful fischis. ¹⁷ The ende of weie is confermyd for it; and alle thingis ben maad in the word of hym. ¹⁸ We seien many thingis, and we faylen in wordis; forsothe he is the endyng of wordis. ¹⁹ To what thing schulen we be myyti, that han glorie in alle thingis? for he is al myyti aboue alle hise werkis. ²⁰ The Lord is ferdful, and ful greet; and his power is wondurful. ²¹ Glorifie ye the Lord as myche as euere ye moun, yit he schal be myytiere; and his grete doynge is wondurful. ²² Ye blessynge the Lord, enhaunse hym as myche as ye moun; for he is more than al preisyng.