Isaiah 9

¹ Who siy hym, and schal telle out? and who schal magnefie hym, as he is fro the bigynnyng? ² Many thingis gretter than these ben hid fro vs; for we han seyn fewe thingis of hise werkis. ³ Forsothe the Lord made alle thingis; and he yaf wisdom to men doynge feithfuli. ⁵ Preise we gloriouse men, and oure fadris in her generacioun. ⁶ The Lord made myche glorie bi his greet doyng, fro the world. ⁷ Grete men in vertu weren lordis in her poweris, and riche in her prudence; tellynge in profetis the dignete of profetis, and comaundynge in present puple, ⁸ and tellynge hoolieste wordis to puplis, bi the vertu of prudence. ⁹ Sekynge maneres of musik in her childhod, and tellynge songis of scripturis. ¹⁰ Riche men in vertu, hauynge the studie of fairnesse, makynge pees in her housis. ¹¹ Alle these men gaten glorie in the generaciouns of her folk; and ben had in preysyngis in her daies. ¹² Thei that weren borun of hem, leften a name to telle the preisyngis of hem. ¹³ And summe ben, of whiche is no mynde; thei perischiden as thei that weren not, and thei weren borun as not borun; and her sones perischiden with hem. ¹⁴ But also tho men of mercy ben, whose pitees failiden not; ¹⁵ and good eritage dwellide contynueli with the seed of hem. ¹⁶ And the seed of her sones sones stood in testament, ¹⁷ and the eritage of her sones dwellith for hem, til in to with outen ende; the seed of hem, and the glorie of hem, schal not be forsakun. ¹⁸ The bodies of hem ben biried in pees; and the name of hem schal lyue in to generaciouns and generaciouns. ¹⁹ Puplis tellen the wisdom of hem; and the chirche tellith the preysyng of hem. ²⁰ Enok pleside God, and was translatid in to paradis, that he yyue wisdom to folkis. ²¹ Noe was foundun parfit and iust, and he was maad recouncelynge in the tyme of wrathfulnesse.