Judith 10

¹ for God schal not manaasse so as man, nethir as a sone of man he schal be enflawmed to wrathfulnesse. 2 And therfor meke we oure soulis to hym, and in contrit spirit and maad meke serue we hym; 3 and seie we wepynge to the Lord, that aftir his wille so he do his merci with vs; and as oure herte is troblid in the pride of hem, so haue we glorie also of oure mekenesse. ⁴ For we sueden not the synnes of oure fadris, that forsoken her God, and worschipiden alien goddis; 5 for which greet trespas thei weren youun to her enemyes in to swerd, and in to raueyn, and in to confusioun; but we knowen not an othir God outakun hym. 6 Abide we meke his coumfort, and he schal seke oure blood of the turmentis of oure enemies; and he schal make meke alle folkis, whiche euer risen ayens vs; and oure Lord God schal make hem without onour. ⁷ And now, britheren, for ye ben prestis in the puple of God, and the soule of hem hangith of you, reise ye her hertis at youre speche, that thei be myndeful, that oure fadris weren temptid, that thei schulden be preued, whethir thei worschipiden God verili. ⁸ Thei owen to be myndeful, hou oure fadir Abraham was temptid, and he was preuyd bi many tribulaciouns, and was maad the frend of God. ⁹ So Isaac, so Jacob, so Moyses, and alle that plesiden the Lord, passiden feithful bi many tribulaciouns. 10 Sotheli thei that resseyueden not temptaciouns with the drede of the Lord, and brouyten forth her vnpacience, and the schenschip of her grutchyng ayens the Lord, ¹¹ weren distried of a distriere, and perischiden of serpentis. ¹² And therfor venge we not vs for these thingis whiche we suffren; ¹³ but arette we, that these same turmentis ben lesse than oure synnes, and bileue we, as seruauntis of the Lord that ben chastisid, that the betyngis of the Lord ben comun to amendyng, and not to oure perdicioun. ¹⁴ And Ozie and the prestis seiden to hir, Alle thingis, whiche thou hast spoke, ben sothe, and no repreuyng is in thi wordis. ¹⁵ Now therfor preie thou for vs, for thou art an hooli womman, and dredynge God. ¹⁶ And Judith seide to hem, As ye knowen, that this, that Y myyte speke, is of God, ¹⁷ so preue ye, if this that Y purposide to do, is of God; and preie ye, that God make stidfast my counsel. ¹⁸ Ye schulen stonde at the yate this niyt, and Y schal go out with my fre handmayde; and preie ye, that, as ye seiden, the Lord biholde his puple Israel in fyue daies. ¹⁹ But Y nyle, that ye enquere my doyng, and til that Y telle to you, `noon othir thing be doon, no but preier for me to oure Lord God. ²⁰ And Ozie, the prince of Juda, seide to hir, Go thou in pees, and the Lord be with thee in the veniaunce of oure enemyes. And thei turneden ayen, and yeden awey. ²² And while thei yeden awei, Judith entride in to hir oratorie, and sche clothide hir silf with an heire, and puttide aische on hir heed; and sche bowide doun hir silf to the Lord, and criede to the Lord, and seide, ²³ Lord God of my fadir Symeon, which yauest to hym a swerd in to defence of aliens, that weren defouleris in her defoulyng, and maden nakid the hipe of a virgyn in to confusioun;