Job 16

¹ Y drede alle my werkis, witynge that thou woldist not spare the trespassour. 2 Sotheli if Y am also thus wickid, whi haue Y trauelid in veyn? 3 Thouy Y am waischun as with watris of snow, and thouy myn hondis schynen as moost cleene, 4 netheles thou schalt dippe me in filthis, and my clothis, that is, werkis, schulen holde me abhomynable. ⁵ Trewli Y schal not answere a man, which is lijk me; nether that may be herd euenli with me in doom. ⁶ Noon is, that may repreue euer eithir, and sette his hond in bothe. 7 Do he awei his yerde fro me, and his drede make not me aferd. 8 Y schal speke, and Y schal not drede hym; for Y may not answere dredynge. 10 Yt anoieth my soule of my lijf; Y schal lete my speche ayens me, Y schal speke in the bitternesse of my soule. 11 Y schal seie to God, Nyle thou condempne me; schewe thou to me, whi thou demest me so. 12 Whether it semeth good to thee, if thou falsli chalengist and oppressist me, the werk of thin hondis; and if thou helpist the counsel of wickid men? ¹³ Whethir fleischli iyen ben to thee, ethir, as a man seeth, also thou schalt se? ¹⁴ Whether thi daies ben as the daies of man, and thi yeeris ben as mannus tymes; 15 that thou enquere my wickidnesse, and enserche my synne? 16 And wite, that Y haue do no wickid thing; sithen no man is, that may delyuere fro thin hond? ¹⁷ Thin hondis han maad me, and han formed me al in cumpas; and thou castist me doun so sodeynli. ¹⁸ Y preye, haue thou mynde, that thou madist me as cley, and schalt brynge me ayen in to dust. ¹⁹ Whether thou hast not mylkid me as mylk, and hast cruddid me togidere as cheese? ²⁰ Thou clothidist me with skyn and fleisch; thou hast ioyned me togidere with boonys and senewis. ²¹ Thou hast youe lijf and mercy to me, and thi visiting hath kept my spirit. ²² Thouy thou helist these thingis in thin herte, netheles Y woot, that thou hast mynde of alle thingis.