Job 22

¹ Fatnesse, that is, pride comyng forth of temporal aboundaunce, hilide his face, that is, the knowyng of vndurstondyng, and outward fatnesse hangith doun of his sidis. ² He schal dwelle in desolat citees, and in deseert, ethir forsakun, housis, that ben turned in to biriels. 3 He schal not be maad riche, nether his catel schal dwelle stidefastli; nether he schal sende his roote in the erthe, 4 nether he schal go awei fro derknessis. Flawme schal make drie hise braunchis, and he schal be takun a wey bi the spirit of his mouth. 5 Bileue he not veynli disseyued bi errour, that he schal be ayenbouyt bi ony prijs. 6 Bifor that hise daies ben fillid, he schal perische, and hise hondis schulen wexe drye; 7 he schal be hirt as a vyne in the firste flour of his grape, and as an olyue tre castinge awei his flour. 8 For the gaderyng togidere of an ipocrite is bareyn, and fier schal deuoure the tabernaclis of hem, that taken yiftis wilfuli. 9 He conseyuede sorewe, and childide wickidnesse, and his wombe makith redi tretcheries. 11 Forsothe Joob answeride, and seide, Y herde ofte siche thingis; ¹² alle ye ben heuy coumfortouris. ¹³ Whether wordis ful of wynd schulen haue an ende? ether ony thing is diseseful to thee, if thou spekist? ¹⁴ Also Y myyte speke thingis lijk to you, and Y wolde, that youre soule were for my soule; 15 and Y wolde coumfort you by wordis, and Y wolde moue myn heed on you; 16 Y wolde make you stronge bi my mouth, and Y wolde moue lippis as sparynge you. 17 But what schal Y do? If Y speke, my sorewe restith not; and if Y am stille, it goith not awei fro me. 18 But now my sorewe hath oppressid me, and alle my lymes ben dryuun in to nouyt. 19 My ryuelyngis seien witnessyng ayens me, and a fals spekere is reisid ayens my face, and ayenseith me. 20 He gaderide togidere his woodnesse in me, and he manaasside me, and gnastide ayens me with his teeth; myn enemye bihelde me with ferdful iyen. 21 Thei openyden her mouthis on me, and thei seiden schenschip, and smytiden my cheke; and thei ben fillid with my peynes. 22 God hath closid me togidere at the wickid, and hath youe me to the hondis of wickid men. 23 Y thilke riche man and famouse sum tyme, am al to brokun sudeynli; he helde my nol; he hath broke me, and hath set me as in to a signe. ²⁴ He hath cumpasside me with hise speris, he woundide togidere my leendis; he sparide not, and schedde out myn entrails in to the erthe. ²⁵ He beet me with wounde on wounde; he as a giaunt felde in on me. ²⁶ Y sewide togidere a sak on my skyn; and Y hilide my fleisch with aische. ²⁷ My face bolnyde of wepynge, and myn iyeliddis wexiden derke. ²⁸ Y suffride these thingis with out wickidnesse of myn hond, that is, werk, whanne Y hadde cleene preieris to God. 29 Erthe, hile thou not my blood, and my cry fynde not in thee a place of hidyng. 30 For, lo! my witnesse is in heuene; and the knowere of my consience is in hiye places.