Job 27

¹ For Y woot, that myn ayenbiere lyueth, and in the laste dai Y schal rise fro the erthe; ² and eft Y schal be cumpassid with my skyn, and in my fleisch Y schal se God, my sauyour. ³ Whom Y my silf schal se, and myn iyen schulen biholde, and not an other man. This myn hope is kept in my bosum. ⁴ Whi therfor seien ye now, Pursue we hym, and fynde we the roote of a word ayens hym? ⁵ Therfor fle ye fro the face of the swerd; for the swerd is the vengere of wickidnessis, and wite ye, that doom schal be. ⁷ Forsothe Sophar Naamathites answeride, and seide, ⁸ Therfor my thouytis dyuerse comen oon aftir anothir; and the mynde is rauyischid in to dyuerse thingis. ⁹ Y schal here the techyng, bi which thou repreuest me; and the spirit of myn vndurstondyng schal answere me. ¹⁰ Y woot this fro the bigynnyng, sithen man was set on erthe, ¹¹ that the preisyng of wickid men is schort, and the ioie of an ypocrite is at the licnesse of a poynt. ¹² Thouy his pride stieth in to heuene, and his heed touchith the cloudis, 13 he schal be lost in the ende, as a dunghil; and, thei that sien hym, schulen seie, Where is he? 14 As a dreem fleynge awei he schal not be foundun; he schal passe as a nyytis siyt. ¹⁵ The iye that siy hym schal not se; and his place schal no more biholde him. ¹⁶ Hise sones schulen be `al to-brokun with nedynesse; and hise hondis schulen yelde to hym his sorewe. ¹⁷ Hise boonys schulen be fillid with the vices of his yong wexynge age; and schulen slepe with hym in dust. ¹⁸ For whanne yuel was swete in his mouth, he hidde it vndur his tunge. ¹⁹ He schal spare it, and schal not forsake it; and schal hide in his throte. ²⁰ His breed in his wombe schal be turned in to galle of snakis withynne. ²¹ He schal spue out the richessis, whiche he deuouride; and God schal drawe tho ritchessis out of his wombe. ²² He schal souke the heed of snakis; and the tunge of an addre schal sle hym. ²³ Se he not the stremys of the flood of the stronde, of hony, and of botere.