Job 32

² Forsothe Joob answeride, and seide, Whos helpere art thou? ³ whether of the feble, and susteyneste the arm of hym, which is not strong? 4 To whom hast thou youe counsel? In hap to hym that hath not wisdom; and thou hast schewid ful myche prudence. 5 Ether whom woldist thou teche? whether not hym, that made brething? 6 Lo! giauntis weilen vnder watris, and thei that dwellen with hem. 7 Helle is nakid bifor hym, and noon hilyng is to perdicioun. 8 Which God stretchith forth the north on voide thing, and hangith the erthe on nouyt. 9 Which God byndith watris in her cloudis, that tho breke not out togidere dounward. ¹⁰ Whych God holdith the cheer of his seete, and spredith abrood theron his cloude. 11 He hath cumpassid a terme to watris, til that liyt and derknessis be endid. 12 The pilers of heuene tremblen, and dreden at his wille. 13 In the strengthe of hym the sees weren gaderid togidere sudeynly, and his prudence smoot the proude. 14 His spiryt ournede heuenes, and the crokid serpent was led out bi his hond, ledynge out as a mydwijf ledith out a child. 15 Lo! these thingis ben seid in partie of hise weyes; and whanne we han herd vnnethis a litil drope of his word, who may se the thundur of his greetnesse? ¹⁷ Also Joob addide, takynge his parable, and seide, ¹⁸ God lyueth, that hath take awey my doom, and Almyyti God, that hath brouyt my soule to bitternesse. ¹⁹ For as long as breeth is in me, and the spirit of God is in my nose thirlis, ²⁰ my lippis schulen not speke wickidnesse, nether my tunge schal thenke a leesyng. ²¹ Fer be it fro me, that Y deme you iust; til Y faile, Y schal not go awei fro myn innocence. ²² Y schal not forsake my iustifiyng, which Y bigan to holde; for myn herte repreueth me not in al my lijf.