Job 39

¹ If an aungel, oon of a thousynde, is spekynge for hym, that he telle the equyte of man, God schal haue mercy on hym, ² and schal seie, Delyuere thou hym, that he go not doun in to corrupcioun; Y haue founde in what thing Y schal do merci to hym. ³ His fleisch is wastid of turmentis; turne he ayen to the daies of his yonge wexynge age. ⁴ He schal biseche God, and he schal be quemeful to hym; and he schal se his face in hertly ioye, and he schal yelde to man his riytfulnesse. ⁵ He schal biholde men, and he schal seie, Y haue synned, and verili Y haue trespassid; and Y haue not resseyued, as Y was worthi. ⁶ For he delyueride his soule, that it schulde not go in to perischyng, but that he lyuynge schulde se liyt. ⁷ Lo! God worchith alle these thingis in thre tymes bi alle men; ⁸ that he ayen clepe her soulis fro corrupcioun, and liytne in the liyt of lyuynge men. ⁹ Thou, Joob, perseyue, and here me, and be thou stille, the while Y speke. ¹⁰ Sotheli if thou hast what thou schalt speke, answere thou to me, speke thou; for Y wole, that thou appere iust. ¹¹ That if thou hast not, here thou me; be thou stille, and Y schal teche thee wisdom. ¹³ And Helyu pronounside, and spak also these thingis, ¹⁴ Wise men, here ye my wordis, and lerned men, herkne ye me; for the eere preueth wordis, ¹⁵ and the throte demeth metis bi taast. ¹⁶ Chese we doom to vs; and se we among vs, what is the betere. ¹⁷ For Job seide, Y am iust, and God hath distried my doom. ¹⁸ For whi lesynge is in demynge me, and myn arowe is violent with out ony synne. ¹⁹ Who is a man, as Joob is, that drynkith scornyng as watir? ²⁰ that goith with men worchynge wickidnesse, and goith with vnfeithful men? ²¹ For he seide, A man schal not plese God, yhe, thouy he renneth with God. ²² Therfor ye men hertid, that is, vndurstonde, here ye me; vnpite, ethir cruelte, be fer fro God, and wickidnesse fro Almyyti God. ²³ For he schal yelde the werk of man to hym; and bi the weies of ech man he schal restore to hym. ²⁴ For verili God schal not condempne with out cause; nether Almyyti God schal distrie doom. ²⁵ What othere man hath he ordeyned on the lond? ether whom hath he set on the world, which he made? ²⁶ If God dressith his herte to hym, he schal drawe to hym silf his spirit and blast. ²⁷ Ech fleisch schal faile togidere; and a man schal turne ayen in to aisch. 28 Therfor if thou hast vndurstondyng, here thou that that is seid, and herkne the vois of my speche. 29 Whether he that loueth not doom may be maad hool? and hou condempnest thou so myche him, that is iust? 30 Which seith to the kyng, Thou art apostata; which clepith the duykis vnpitouse, ethir vnfeithful.