Job 40

¹ Thei schulen die sudeynli, and at mydnyyt puplis schulen be troblid, ethir schulen be bowid, as othere bookis han; and schulen passe, and schulen take awei a violent man with out hond. 2 For the iyen of God ben on the weies of men, and biholdith alle goyngis of hem. 3 No derknessis ben, and no schadewe of deeth is, that thei, that worchen wickidnesse, be hid there; 4 for it is no more in the power of man, that he come to God in to doom. ⁵ God schal al to-breke many men and vnnoumbrable; and schal make othere men to stonde for hem. ⁶ For he knowith the werkis of hem; therfor he schal brynge yn niyt, and thei schulen be al to-brokun. ⁷ He smoot hem, as vnpitouse men, in the place of seinge men. ⁸ Whiche yeden awei fro hym bi castyng afore, and nolden vndurstonde alle hise weies. 9 That thei schulden make the cry of a nedi man to come to hym, and that he schulde here the vois of pore men. 10 For whanne he grauntith pees, who is that condempneth? Sithen he hidith his cheer, who is that seeth hym? And on folkis and on alle men he hath power to do siche thingis. 11 Which makith a man ypocrite to regne, for the synnes of the puple. ¹² Therfor for Y haue spoke to God, also Y schal not forbede thee. ¹³ If Y erride, teche thou me; if Y spak wickidnesse, Y schal no more adde. ¹⁴ Whether God axith that wickidnesse of thee, for it displeside thee? For thou hast bigunne to speke, and not Y; that if thou knowist ony thing betere, speke thou. ¹⁵ Men vndurstondynge, speke to me; and a wise man, here me. ¹⁶ Forsothe Joob spak folili, and hise wordis sownen not techyng. ¹⁷ My fadir, be Joob preuede til to the ende; ceesse thou not fro the man of wickidnesse, 18 that addith blasfemye ouer hise synnes. Be he constreyned among vs in the meene tyme; and thanne bi hise wordis stire he God to the doom. ²⁰ Therfor Helyu spak eft these thingis, Whethir thi thouyt semeth euene, ²¹ `ether riytful, to thee, that thou schuldist seie, Y am riytfulere than God? ²² For thou seidist, That, that is good, plesith not thee; ethir what profitith it to thee, if Y do synne? ²³ Therfor Y schal answere to thi wordis, and to thi frendis with thee. ²⁴ Se thou, and biholde heuene, and biholde thou the eir, that God is hiyere than thou.