Job 41

¹ Certis if thou doist iustli, what schalt thou yyue to hym; ether what schal he take of thin hond? ² Thi wickidnesse schal anoie a man, which is lijk thee; and thi riytfulnesse schal helpe the sone of a man. ³ Thei schulen cry for the multitude of fals chalengeris, and thei schulen weile for the violence of the arm of tirauntis. ⁴ And Joob seide not, Where is God, that made me, and that yaf songis in the nyyt? ⁵ Which God techith vs aboue the beestis of erthe, and he schal teche vs aboue the briddis of heuene. ⁶ There thei schulen crye, and God schal not here, for the pride of yuele men. ⁷ For God schal not here with out cause, and Almyyti God schal biholde the causis of ech man. ⁸ Yhe, whanne thou seist, He biholdith not; be thou demed bifor hym, and abide thou hym. ⁹ For now he bryngith not in his strong veniaunce, nether vengith greetli felonye. 10 Therfor Joob openith his mouth in veyn, and multiplieth wordis with out kunnyng. 12 Also Helyu addide, and spak these thingis, 13 Suffre thou me a litil, and Y schal schewe to thee; for yit Y haue that, that Y schal speke for God. 14 Y schal reherse my kunnyng fro the bigynnyng; and Y schal preue my worchere iust. 15 For verili my wordis ben with out leesyng, and perfit kunnyng schal be preued to thee. 16 God castith not awei myyti men, sithen he is myyti; 17 but he saueth not wickid men, and he yyueth dom to pore men. 18 He takith not awei hise iyen fro a iust man; and he settith kyngis in seete with out ende, and thei ben reisid there. 19 And if thei ben in chaynes, and ben boundun with the roopis of pouert, 20 he schal shewe to hem her werkis, and her grete trespassis; for thei weren violent, ethir rauenours. ²¹ Also he schal opene her eere, that he chastise; and he schal speke, that thei turne ayen fro wickidnesse. ²² If thei heren, and kepen, thei schulen fille her daies in good, and her yeris in glorie. ²³ Sotheli if thei heren not, thei schulen passe bi swerd, and thei schulen be wastid in foli. ²⁴ Feyneris and false men stiren the ire of God; and thei schulen not crye, whanne thei ben boundun. ²⁵ The soule of hem schal die in tempest; and the lijf of hem among men of wymmens condiciouns. 26 He schal delyuere a pore man fro his angwisch; and he schal opene the eere of hym in tribulacioun. ²⁷ Therfor he schal saue thee fro the streit mouth of the broddeste tribulacioun, and not hauynge a foundement vndur it; sotheli the rest of thi table schal be ful of fatnesse. ²⁸ Thi cause is demed as the cause of a wickid man; forsothe thou schalt resseyue thi cause and doom. ²⁹ Therfor ire ouercome thee not, that thou oppresse ony man; and the multitude of yiftis bowe thee not. ³⁰ Putte doun thi greetnesse with out tribulacioun, and putte doun alle stronge men bi strengthe. ³¹ Dilaie thou not nyyt, that puplis stie for hem. ³² Be thou war, that thou bowe not to wickidnesse; for thou hast bigunne to sue this wickidnesse aftir wretchidnesse. ³³ Lo! God is hiy in his strengthe, and noon is lijk hym among the yyueris of lawe. ³⁴ Who mai seke out the weies of God? ethir who dar seie to hym, Thou hast wrouyt wickidnesse?