Job 42

¹ Alle men seen God; ech man biholdith afer. ² Lo! God is greet, ouercomynge oure kunnyng; the noumbre of hise yeeris is with out noumbre. ³ Which takith awei the dropis of reyn; and schedith out reynes at the licnesse of floodyatis, ⁴ whiche comen doun of the cloudis, that hilen alle thingis aboue. ⁵ If he wole stretche forthe cloudis as his tente, ⁶ and leite with his liyt fro aboue, he schal hile, yhe, ⁷ the herris of the see. For bi these thingis he demeth puplis, and yyueth mete to many deedli men. ⁸ In hondis he hidith liyt; and comaundith it, that it come eft. ⁹ He tellith of it to his freend, that it is his possessioun; and that he may stie to it. ¹¹ Myn herte dredde of this thing, and is moued out of his place. ¹² It schal here an heryng in the feerdfulnesse of his vois, and a sown comynge forth of his mouth. ¹³ He biholdith ouere alle heuenes; and his liyt is ouere the termes of erthe. ¹⁴ Sown schal rore aftir hym, he schal thundre with the vois of his greetnesse; and it schal not be souyt out, whanne his vois is herd. ¹⁵ God schal thundre in his vois wondurfulli, that makith grete thingis and that moun not be souyt out. ¹⁶ Which comaundith to the snow to come doun on erthe, and to the reynes of wijntir, and to the reynes of his strengthe. ¹⁷ Which markith in the hond of alle men, that alle men knowe her werkis.