Judges 15

¹ And Filisteis seiden, Who dide this thing? To whiche it was seid, Sampson, hosebonde of the douytir of Thannathei, for he took awey Sampsones wijf, and yaf to another man, wrouyte this thing. And Filisteis stieden, and brenten bothe the womman and hir fadir. ² To whiche Sampson seide, Thouy ye han do this, netheles yit Y schal axe veniaunce of you, and than Y schal reste. ³ And he smoot hem with greet wounde, so that thei wondriden, and puttiden the hyndrere part of the hipe on the thiy; and he yede doun, and dwellide in the denne of the stoon of Ethan. 4 Therfor Filisteis stieden in to the lond of Juda, and settiden tentis in the place, that was clepid aftirward Lethi, that is, a cheke, wher the oost of hem was spred a brood. ⁵ And men of the lynage of Juda seiden to hem, Whi stieden ye ayens vs? Whiche answeriden, We comen that we bynde Sampson, and yelde to hym tho thingis whiche he wrouyte in vs. 6 Therfor thre thousynde of men of Juda yeden doun to the denne of the flynt of Ethan; and thei seiden to Sampson, Woost thou not, that Filisteis comaunden to vs? Why woldist thou do this thing? To whiche he seide. 7 As thei diden to me, Y dide to hem. Thei seien, We comen to bynde thee, and to bitake thee in to the hondis of Filisteis. To whiche Sampson answeride, Swere ye, and biheete ye to me, that ye sle not me. 8 And thei seiden, We schulen not sle thee, but we schulen bitake thee boundun. And thei bounden him with twei newe cordis, and token fro the stoon of Ethan. 9 And whanne thei hadden come to the place of cheke, and Filisteis criynge hadden runne to hym, the spirit of the Lord felde in to hym, and as stikis ben wont to be wastid at the odour of fier, so and the bondis, with whiche he was boundun, weren scaterid and vnboundun. 10 And he took a cheke foundun, that is, the lowere cheke boon of an asse, that lay, and he killyde with it a thousinde men; and seide, 11 With the cheke of an asse, that is, with the lowere cheke of a colt of femal assis, Y dide hem awey, and Y killide a thousynde men. 12 And whanne he songe these wordis, and hadde fillid, he castide forth fro the hond the lowere cheke; and he clepide the name of that place Ramath Lethi, which is interpretid, the reisyng of a cheke. 13 And he thristide greetly, and criede to the Lord, and seide, Thou hast youe in the hond of thi seruaunt this grettest helthe and victory; and lo! Y die for thyrst, and Y schal falle in to the hondis of vncircumcidid men. 14 Therfor the Lord openyde a wang tooth in the cheke boon of the asse, and watris yeden out therof, bi whiche drunkun he refreischide the spirit, and resseuede strengthis; therfor the name of that place was clepid the Welle of the clepere of the cheke til to present dai. 15 And he demyde Israel in the daies of Filistiym twenti yeer. 17 Also Sampson yede in to Gazam, and he siy there a womman hoore, and he entride to hir. 18 And whanne Filisteis hadden seyn this, and it was pupplischid at hem, that Sampson entride in to the citee, thei cumpassiden hym, whanne keperis weren set in the yate of the citee; and thei abididen there al nyyt with silence, that in the morewtid thei schulen kille Sampson goynge out. ¹⁹ Forsothe Sampson slepte til to the myddis of the nyyt; and fro thennus he roos, and took bothe the closyngis, ethir leeues, of the yate, with hise postis and lok; and he bar tho leeues, put on the schuldris, to the cop of the hil that biholdith Ebron. ²⁰ After these thingis Sampson louyde a womman that dwellide in the valey of Soreth, and sche was clepid Dalida.