Judges 5

¹ Stronge men in Israel cessiden, and restiden, til Delbora roos, a modir in Israel. ² The Lord chees newe batels, and he destriede the yatis of enemyes; scheeld and spere apperiden not in fourti thousynde of Israel. ³ Myn herte loueth the princes of Israel; ye that offriden you to perel bi youre owyn wille, ⁴ blesse ye the Lord; speke ye, that stien on schynynge assis, and sitten aboue in doom, and goen in the wey. ⁵ Where the charis weren hurtlid doun to gidere, and the oost of enemyes was straunglid, there the riytfulnessis of the Lord be teld, and mercy among the stronge of Israel; thanne the puple of the Lord cam doun to the yatis, and gat prinsehod. ⁶ Rise, rise thou, Delbora, rise thou, and speke a song; rise thou, Barach, and thou, sone of Abynoen, take thi prisoneris. ⁷ The relikis of the puple ben sauyd; the Lord fauyt ayens stronge men of Effraym. ⁸ He dide awei hem in Amalech, and aftir hym of Beniamyn in to thi puplis, thou Amalech. Princes of Machir and of Zabulon yeden doun, that ledden oost to fiyte. ⁹ The duykis of Isachar weren with Delbora, and sueden the steppis of Barach, which yaf hym silf to perel, as in to a dich, and in to helle. While Ruben was departid ayens hym silf; the strijf of greet hertyd men was foundun. ¹⁰ Whi dwellist thou bitwixe tweyne endis, that thou here the hissyngis of flockis? While Ruben was departid ayens hym silf, the strijf of greet hertid men was foundun. 11 Gad restide biyendis Jordan, and Dan yaf tent to schippis. Aser dwellide in the brenke of the see, and dwellide in hauenes. ¹² Forsothe Zabulon and Neptalym offriden her lyues to deeth, in the cuntre of Morema, that is interpretid, hiy. 13 Kyngis camen, and fouyten; kyngis of Canaan fouyten in Thanath, bisidis the watris of Magedon; and netheles thei token no thing bi prey. 14 Fro heuene me fauyt ayens hem; sterris dwelliden in her ordre and cours, and fouyten ayens Sisara. ¹⁵ The stronde of Cyson drow the deed bodies of hem, the stronde of Cadymyn, the stronde of Cyson. My soule, to-trede thou stronge men. 16 The hors howis felden, while the strongeste of enemyes fledden with bire, and felden heedli. 17 Curse ye the lond of Meroth, seide the aungel of the Lord, curse ye the dwelleris of hym, for thei camen not to the help of the Lord, in to the help of the strongeste of hym. ¹⁸ Blessyd among wymmen be Jahel, the wijf of Aber Cyney; blessid be sche in hir tabernacle. ¹⁹ To Sisara axynge watir sche yaf mylk, and in a viol of princes sche yaf botere. ²⁰ Sche puttide the left hond to a nail, and the riyt hond to the hameris of smyythis; and sche smoot Sisara, and souyte in the heed a place of wounde, and perside strongli the temple. 21 He felde bitwixe the feet of hir, he failide, and diede; he was waltryd bifor hir feet, and he lay with out soule, and wretchidful. ²² His modir bihelde bi a wyndow, and yellide; and sche spak fro the soler, Whi tarieth his chaar to come ayen? Whi tarieden the feet of his foure horsid cartis? ²³ Oon wisere than othere wyues of hym answeride these wordis to the modir of hir hosebonde, 24 In hap now he departith spuylis, and the faireste of wymmen is chosun to hym; clothis of dyuerse colouris ben youun to Sisara in to prey, and dyuerse aray of houshold is gaderid to ourne neckis. 25 Lord, alle thin enemyes perische so; sotheli, thei that louen thee, schyne so, as the sunne schyneth in his risyng. 26 And the lond restide fourti yeer. 28 Forsothe the sones of Israel diden yuel in the siyt of the Lord, and he bitook hem in the hond of Madian seuene yeer. ²⁹ And thei weren oppressid of hem greetly; and thei maden dichis, and dennes to hem silf in hillis, and strongeste places to fiyte ayen. 30 And whanne Israel hadde sowe, Madian stiede, and Amalech, and othere of the naciouns of the eest; ³¹ and thei settiden tentis at the sones of Israel, and wastiden alle thingis as tho weren in eerbis, ethir grene corn, til to the entryng of Gaza, and outirli thei leften not in Israel ony thing perteynynge to lijf, not scheep, not oxun, not assis.