Micah 1

¹ Therfor hir kynesmen wepten, and alle that knewen hir. ² Forsothe the twei prestis risiden togidere in the myddis of the puple, and settiden her hondis on the heed of hir. ³ And sche wepte, and bihelde to heuene, and hir herte hadde trist in the Lord. ⁴ And the prestis seiden, Whanne we walkiden aloone in the gardyn, this Susanne entride with twei damesels; and sche closide the dore of the gardyn, and lefte the damesels. ⁵ And a yong man, that was hid, cam to hir, and lai bi hir. ⁶ Certis whanne we weren in a corner of the gardyn, we sien the wickidnesse, and runnen to hem, and we sien hem meddlid togidere. ⁷ And sotheli we myyten not take hym, for he was strongere than we; and whanne he hadde opened the doris, he skippide out. ⁸ But whanne we hadde take this womman, we axiden, who was the yonge man; and sche nolde schewe to vs. Of this thing we ben witnessis. ⁹ The multitude bileuede to hem, as to the eldre men and iugis of the puple, and condempneden hir to deth. ¹⁰ Forsothe Susanne criede loud with greet vois, and seide, Lord God, without bigynnyng and ende, that art knowere of hid thingis, that knowist alle thingis bifore that tho ben don; ¹¹ thou wost, that thei han bore fals witnessyng ayens me. And lo! Y dye, whanne Y haue not do ony of these thingis, whiche these men han maad maliciously ayens me. ¹² Forsothe the Lord herde the vois of hir. ¹³ And whanne she was led to the deth, the Lord reiside the hooli spirit of a yonge child, whos name was Danyel. ¹⁴ And he criede loude with a greet vois, Y am cleene of the blood of this womman. ¹⁵ And al the puple turned ayen to hym, and seide, What is this word, which thou hast spoke? ¹⁶ And whanne he stood in the myddis of hem, he seide, So ye, fonned children of Israel, not demynge nether knowynge that that is trewe, condempneden the douyter of Israel.