Micah 2

¹ Therfor the puple turnede ayen with haaste. And the elde men seiden to hym, Come thou, and sitte in the myddis of vs, and schewe to vs; for God hath youe to thee the onour of eelde. ² And Danyel seide to hem, Departe ye hem atwynny fer, and Y schal deme hem. ³ Therfor, whanne thei weren departid oon fro the tother, he clepide oon of hem, and seide to hym, Thou elde man of yuel daies, now thi synnes ben comun, whiche thou wrouytist bifore, ⁴ demynge vniust domes, oppressynge innocentis, and delyuerynge gilti men, whanne the Lord seith, Thou schalt not sle an innocent and iust man. ⁵ But now if thou siest hir, seie thou, vndur what tree thou siest hem spekynge togidere to hem silf? Which seide, Vndur an haw tree. ⁶ Forsothe Danyel seide, Riytli thou liest in thin heed; for lo! the angel of the Lord, bi a sentence takun of hym, schal kitte thee bi the myddil. ⁷ And whanne he was stirid awei, he comaundide the tother to come, and seide to hym, Thou seed of Canaan, and not of Juda, fairnesse hath disseyued thee, and coueitise hath misturned thin herte; ⁸ thus ye diden to the douytris of Israel, and thei dredden, and spaken to you, but the douyter of Juda suffride not youre wickidnesse. ⁹ Now therfor seie thou to me, vndur what tree thou siest hem spekynge togidere to hem silf? ¹⁰ Which seide, Vndur a blak thorn. Forsothe Danyel seide to hym, Riytli also thou liest in thin heed; for the aungel of the Lord dwellith, and hath a swerd, that he kitte thee bi the myddil, and sle you. ¹¹ Therfor al the puple criede lowde with greet vois, and blessiden `the Lord, that saueth hem that hopen in hym. ¹² And thei risiden togidere ayens the twei preestis; for Danyel hadde conuyctid hem bi her mouth, that thei hadden bore fals witnessyng; and thei diden to hem, as thei hadden do yuele ayens the neiyboresse, ¹³ that thei schulden do bi the lawe of Moises, and thei killiden hem. And giltles blood was sauyd in that dai.