Micah 4

¹ And whanne thou entrist eerli, if thou fyndist not alle thingis etun of Bel, we schulen die bi deth, ether Daniel schal die, that liede ayens vs. ² Sotheli thei tristiden, for thei hadden maad a priuy entryng vndur the boord, and bi it thei entriden euere, and deuouriden tho thingis. ³ Forsothe it was don, aftir that thei yeden out, and the king settide metis bifor Bel, Daniel comaundide to hise children, and thei brouyten aischis, and he riddlide thorouy al the temple bifor the kyng. And thei yeden out, and closiden the dore, and aseeliden with the ryng of the kyng, and yeden forth. ⁴ But the preestis entriden in niyt, bi her custom, and the wyues, and children of hem, and eeten and drunken alle thingis. ⁵ Forsothe the kyng roos moost eerli, and Daniel with hym. ⁶ And the kyng seide, Daniel, whether the seelis ben saaf? And he answeride, King, tho ben saaf. ⁷ And anoon whanne thei hadden openyd the dore, the king biheelde the boord, and he criede an hiy with a greet vois, Bel, thou art greet, and no gile is at thee. ⁸ And Daniel leiyede, and he helde the kyng, that he entride not with ynne. And Daniel seide, Lo! the pawment, perseyue thou whos steppis these ben. ⁹ And the kyng seide, Y se steppis of men, and of wymmen, and of yonge children. And the kyng was wrooth. ¹⁰ Thanne the kyng took the preestis, and the wyues, and children of hem; and thei schewiden to hym litle priuy doris, bi whiche thei entriden, and wastiden tho thingis that weren on the boord. ¹¹ Therfor the kyng killide hem, and bitook Bel in to the power of Daniel, which distriede thilke Bel, and his temple. ¹² And a greet dragoun was in that place, and Babiloyns worschipiden it. ¹³ And the kyng seide to Daniel, Lo! now thou maist not seie, that this is not a quik god; therfor worschipe thou hym.