Micah 5

¹ But thou, kyng, yyue power to me, and Y schal sle the dragoun, with out swerd and staf. And the kyng seide, Y yyue to thee. ² Therfor Daniel took pitch, and talow, and heeris, and sethide togidere; and he made gobetis, and yaf in to the mouth of the dragun; and the dragun was al to-brokun. And Daniel seide, Lo! whom ye worschipiden. ³ And whanne Babiloynes hadden herd this thing, thei hadden indignacioun greetli; and thei weren gaderid ayens the king, and seiden, The king is maad a Jew; he distriede Bel, and killide the dragun, and slow the preestis. ⁴ And thei seiden, whanne thei weren comun to the kyng, Bitake thou to vs Daniel, that distriede Bel, and killide the dragun; ellis we schulen sle thee, and thin hous. ⁵ Therfor the kyng siy, that thei fellen in on hym greetli; and he was compellid bi nede, and he bitook Daniel to hem. ⁶ Whiche senten hym in to the lake of liouns, and he was there seuene daies. ⁷ Certis seuene liouns weren in the lake, and twei bodies and twei scheep weren youun to hem ech dai. And thanne tho weren not youun to hem, that thei schulden deuoure Daniel. ⁸ Forsothe Abacuk, the profete, was in Judee, and he hadde soden potage, and hadde set in looues in a litil panyere; and he yede in to the feeld, to bere to reperis. ⁹ And the aungel of the Lord seide to Abacuk, Bere thou the mete, which thou hast, in to Babiloyne, to Daniel, which is in the lake of liouns. ¹⁰ And Abacuk seide, Lord, Y siy not Babiloyne, and Y knew not the lake. ¹¹ And the aungel of the Lord took hym bi his top, and bar hym bi the heer of his heed; and he `settide thilke Abacuk in Babiloyne, on the lake, in the fersnesse of his spirit. ¹² And Abacuk criede, and seide, Daniel, the seruaunt of God, take thou the mete, that God hath sent to thee. ¹³ And Daniel seide, Lord God, thou hast mynde on me, and hast not forsake hem that louen thee. ¹⁴ And Daniel roos, and eet; certis the aungel of the Lord restoride Abacuk anoon in his place. ¹⁵ Therfor the kyng cam in the seuenthe dai to biweile Danyel; and he cam to the lake, and lokide in, and lo! Daniel sittynge in the myddis of liouns.