Nehemiah 12

¹ Certis dekenes; Jesua, Bennuy, Cedynyel, Serabie, Juda, Mathanye, weren ouer the ympnes, thei and her britheren; ² and Bezechie, and Ezanny, and the britheren of hem, ech man in his office. ³ Sotheli Josue gendride Joachym, and Joachym gendride Eliasib, and Eliasib gendride Joiada, ⁴ and Joiada gendride Jonathan, and Jonathan gendride Jeddaia. ⁵ Forsothe in the daies of Joachym weren prestis, and princis of meynees of prestis, Saraie, Amarie, Jeremye, Ananye, Esdre, ⁶ Mosollam, Amarie, Johannam, ⁷ Mylico, Jonathan, Sebenye, ⁸ Joseph, Aram, Edua, ⁹ Maraioth, Elchie, Addaie, Zacharie, Genthon, ¹⁰ Mosollam, Abie, Zecherie, Myamyn, and Moadie, ¹¹ Phelti, Belge, Sannya, Semeie, ¹² Jonathan, Joarib, Mathanye, Jodaie, Azi, ¹³ Sellaye, Mochebor, Helchie, ¹⁴ Asebie, Idaie, Nathanael. ¹⁵ Dekenes in the daies of Eliasib, and of Joiada, and of Jonam, and of Jedda, weren writun princes of meynees, and prestis in the rewme of Darius of Persis. 16 The sones of Leuy, princes of meynees, weren writun in the book of wordis of daies, and til to the daies of Jonathan, sone of Eliasib. ¹⁷ And the princes of dekenes weren Asebie, Serebie, and Jesue, the sone of Cedynyel; and the britheren of hem bi her whiles, that thei schulden herie and knowleche bi the comaundement of kyng Dauid, the man of God, and thei schulden kepe euenli bi ordre. 18 Mathanye, and Bethbecie, and Obedie, Mosollam, Thelmon, Accub, weren keperis of the yatis, and of the porchis bifor the yatis. 19 These weren in the daies of Joachym, sone of Josue, sone of Josedech, and in the daies of Neemye, duyk, and of Esdras, the prest and writere. 20 Forsothe in the halewyng of the wal of Jerusalem thei souyten dekenes of alle her places, to bryng hem in to Jerusalem, and to make the halewyng in gladnesse, in the doyng of thankyngis, and in song, and in cymbalis, and in sautrees, and in harpis. 21 Sotheli the sones of syngeris weren gaderid bothe fro the feeldi places aboute Jerusalem, and fro the townes of Nethophati, 22 and fro the hows of Galgal, and fro the cuntreis of Gebez, and of Amanech; for syngeris hadden bildid townes to hem silf in the cumpas of Jerusalem. 23 And prestis and dekenes weren clensid, and thei clensiden the puple, and the yatis, and the wal. 24 Forsothe Y made the princes of Juda to stie on the wal, and Y ordeynede twei greete queris of men heriynge; and thei yeden to the riyt side on the wal, to the yate of the dunghil. 25 And Osaie yede aftir hem, and the half part of prynces of Juda, 26 and Azarie, Esdras, and Mosollam, Juda, and Beniamyn, and Semeye, and Jeremye yeden aftir hem. ²⁷ And of the sones of prestis syngynge in trumpis; Zacharie, the sone of Jonathan, the sone of Semeie, the sone of Mathanye, the sone of Machaie, the sone of Zeccur, the sone of Asaph. ²⁸ And hise britheren; Semeie, and Azarel, Malalai, Galalai, Maai, Nathanael, and Juda, and Amany, in the instrumentis of song of Dauid, the man of God; and Esdras, the wrytere, bifor hem, in the yate of the welle. ²⁹ And thei stieden ayens hem in the greis of the citee of Dauid, in the stiyng of the wal, on the hows of Dauid, and til to the yate of watris at the eest. 30 And the secounde queer of men tellynge thankyngis yede euene ayens, and Y aftir hym; and the half part of the puple was on the wal, and on the tour of ouenys, and til to the broddeste wal; ³¹ and on the yate of Effraym, and on the elde yate, and on the yate of fischis, and on the toure of Ananeel, and on the tour of Emath, and thei camen til to the yate of the floc; 32 and thei stoden in the yate of kepyng. And twei queeris of men heriynge stoden in the hows of God, and Y and the half part of magistratis with me. 33 And the prestis, Eliachym, Maasie, Myamyn, Mychea, Helioneai, Zacharie, Ananye, in trumpis; 34 and Maasie, and Senea, and Eleazar, and Azi, and Johannan, and Melchia, and Elam, and Ezer; and the syngeris sungen clereli, and Jezraie, the souereyn. 35 And thei offriden in that dai grete sacrifices, and weren glad; for God hadde maad hem glad with grete gladnesse. But also her wyues and lawful childre weren ioiful, and the gladnesse of Jerusalem was herd fer. 36 Also thei noumbriden in that dai men ouer the keping places of tresour, to moiste sacrifices, and to the firste fruytis, and to tithis, that the princes of the citee schulden brynge in bi hem, in the fairenesse of doyng of thankyngis, prestis and dekenes; for Juda was glad in prestis and dekenes present. ³⁷ And thei kepten the kepyng of her God, the kepyng of clensyng; and syngeris, and porteris, bi the comaundement of Dauid and of Salomon, his sone; ³⁸ for in the daies of Dauid and of Asaph fro the bigynnyng princes of syngeris weren ordeyned, heriyng in song, and knoulechynge to God. ³⁹ And al Israel, in the daies of Zorobabel, and in the daies of Neemye, yauen partis to syngeris and to porteris bi alle the daies; and thei halewiden dekenes, and the dekenes halewiden the sones of Aaron. 41 Forsothe in that dai it was red in the book of Moises, in heryng of the puple; and it was foundun writun ther ynne, that Amonytis and Moabitis owen not entre in to the chirche of God til in to with outen ende; 42 for thei metten not the sones of Israel with breed and watir, and thei hiriden ayens the sones of Israel Balaam, for to curse hem; and oure God turnede the cursyng in to blessyng. 43 Sotheli it was doon, whanne thei hadden herd the lawe, thei departiden ech alien fro Israel. ⁴⁴ And upon these thingis Eliasib, the prest, was blameful, that was the souereyn in the tresorie of the hows of oure God, and was the neiybore of Tobie. 45 Therfor he made to him a grete treserie, that is, in the hows of God; and men kepynge yiftis, and encence, and vessels, and the tithe of wheete, of wyn, and of oile, the partis of dekenes, and of syngeris, and of porteris, and the firste fruytis of prestis, `weren there bifor him. ⁴⁶ Forsothe in alle these thingis Y was not in Jerusalem; for in the two and thrittithe yeer of Artaxerses, kyng of Babiloyne, Y cam to the kyng, and in the ende of daies Y preiede the kyng. ⁴⁷ And Y cam in to Jerusalem, and Y vndurstood the yuel, which Eliasib hadde do to Tobie, to make to hym a tresour in the porchis of Goddis hows; and to me it semede ful yuel.