Numbers 29

¹ Also the tenthe dai of this seuenthe monethe schal be hooli and worschipful to you, and ye schulen turmente youre soulis; ye schulen not do ony seruyle werk ther ynne. ² And ye schulen offre brent sacrifice to the Lord, in to swettiste odour; o calf of the droue, o ram, seuene lambren of o yeer with out wem. ³ And in the sacrifices of tho ye schulen offre thre tenthe partis of flour spreynt togidere with oyle, bi ech calf, twey tenthe partis bi a ram, 4 the tenthe part of a dyme bi each lomb, that ben togidere seuene lambren. 5 And ye schulen offre a buc of geet for synne, with out these thingis that ben wont to be offrid for synne in to clensyng, and ye schulen offre euerlastinge brent sacrifice in sacrifice, and fletinge offryngis of tho. 6 Forsothe in the fiftenthe dai of this seuenthe monethe, that schal be hooli and worschipful to you, ye schulen not do ony seruyle werk, but ye schulen halewe solempnyte to the Lord in seuene daies; and ye schulen offre brent sacrifice, 7 in to swetiste odour to the Lord, threttene calues of the droue, twey rammes, fouretene lambren of o yeer, with out wem. 8 And in the moiste sacrifices of tho ye schulen offre thre tenthe partis of flour spreynt to gidere with oile bi ech calf, that ben togidere threttene calues, and ye schulen offre twei tenthe partis to twei rammes togidere, that is, o tenthe part to o ram, and ye schulen offre the tenthe part of a ⁹ dyme to ech lomb, whiche ben to gidere fourteene lambren. ¹⁰ And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof. ¹¹ In the tother dai ye schulen offre twelue calues of the droue, twei rammes, fouretene lambren of o yeer without wem. ¹² And ye schulen halewe riytfuli sacrifices, and moiste offryngis of alle, bi calues, and rammes, and lambren. ¹³ And ye schulen offre a buc of geet for synne, with out euerlastynge brent sacrifice, and with out the sacrifice and moist offryng therof. 14 In the thridde dai ye schulen offre euleuen calues, twei rammes, fourtene lambren of o yeer, without wem. 15 And ye schulen halewe riytfuli the sacrifices, and moiste offryngis of alle, bi the caluys, and rammes, and lambren. 16 And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof. ¹⁷ In the fourthe day ye schulen offre ten calues, twey rammes, fourtene lambren of o yeer with oute wem. ¹⁸ And ye schulen halewe riytfuli the sacrifices, and moiste offryngis of alle, bi the calues, and rammes, and lambren. ¹⁹ And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof. ²⁰ In the fyuethe dai ye schulen offre nyne calues, twei rammes, fourtene lambren of o yeer, with oute wem. ²¹ And ye schulen halewe riytfuli the sacrifices, and moiste offryngis of alle, bi the calues, and rammes, and lambren. 22 And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof. ²³ In the sixte dai ye schulen offre eiyt calues, and twei rammes, fourtene lambren of o yeer with out wem. ²⁴ And ye schulen halewe riytfuli the sacrifices, and moiste offryngis of alle, bi the calues, and rammes, and lambren. 25 And ye schulen offre a buk of geet for synne, with out euerlastynge brent sacrifice, and with out the sacrifice and moiste offryng therof. 26 In the seuenthe dai ye schulen offre seuene calues, twei rammes, fourtene lambren of o yeer with out wem. ²⁷ And ye schulen halewe riytfuli the sacrifices, and moiste offryngis of alle, bi the calues, and rammes, and lambren. 28 And ye schulen offre a buc of geet for synne, with out euerlastynge brent sacrifice, and with out the sacrifice and moiste offryng therof. ²⁹ In the eiythe dai, which is moost solempne ether hooli; ye schulen not do ony seruyle werk, 30 and ye schulen offre brent sacrifice in to swettest odour to the Lord, o calf, o ram, seuene lambren of o yeer with out wem. 31 And ye schulen halewe riytfuli the sacrifices and moiste offryngis of alle, bi the calues, and rammes, and lambren. ³² And ye schulen offre a buc of geet for synne, with out euerlastynge brent sacrifice, and with out the sacrifice, and moiste offryng therof. 33 Ye schulen offre these thingis to the Lord, in youre solempnytees, with out avowis, and wilful offryngis, in brent sacrifice, in sacrifice, in moist offryng, and in peesible sacrifices. 35 And Moises telde to the sones of Israel alle thingis whiche the Lord comaundide to hym. 36 And he spak to the princes of the lynagis of the sones of Israel, This is the word, which the Lord comaundide, If ony of men makith a vowe to the Lord, 37 ethir byndith hym silf bi an ooth, he schal not make voide his word, but he schal fille al thing which he bihiyte. 38 If a womman which is in the hows of hir fadir, and is yit in the age of a damysel, that is, not yit weddid, avowith ony thing, ethir byndith hir silf bi an ooth, if the fadir knowith the avow, which sche bihiyte, and the ooth bi which sche boond hir soule, and he is stille, sche schal be gilti of the ooth, that is, boundun bi the ooth; 39 what euer thing sche bihiyte and swoor, sche schall fille in werk. 40 Forsothe if the fadir ayenseide anoon as he herde, bothe the vowis and oothis of hir schulen be voide, and sche schal not be holdun boundun to the biheeste, for the fadir ayenseide.