Proverbs 18

¹ The weie of lijf is to him that kepith chastising; but he that forsakith blamyngis, errith. ² False lippis hiden hatrede; he that bringith forth dispisinge is vnwijs. ³ Synne schal not faile in myche spekyng; but he that mesurith hise lippis, is moost prudent. ⁴ Chosun siluer is the tunge of a iust man; the herte of wickid men is for nouyt. ⁵ The lippis of a iust man techen ful manye men; but thei that ben vnlerned, schulen die in nedinesse of herte. ⁶ The blessing of the Lord makith riche men; and turment schal not be felowschipid to hem. ⁷ A fool worchith wickidnesse as bi leiyyng; but `wisdom is prudence to a man. ⁸ That that a wickid man dredith, schal come on hym; the desire of iust men schalbe youun to hem. ⁹ As a tempeste passynge, a wickid man schal not be; but a iust man schal be as an euerlastynge foundement. ¹⁰ As vynegre noieth the teeth, and smoke noieth the iyen; so a slow man noieth hem that senten hym in the weie. ¹¹ The drede of the Lord encreesith daies; and the yeeris of wickid men schulen be maad schort. ¹² Abiding of iust men is gladnesse; but the hope of wickid men schal perische. ¹³ The strengthe of a symple man is the weie of the Lord; and drede to hem that worchen yuel. ¹⁴ A iust man schal not be moued with outen ende; but wickid men schulen not dwelle on the erthe. ¹⁵ The mouth of a iust man schal bringe forth wisdom; the tunge of schrewis schal perische. ¹⁶ The lippis of a iust man biholden pleasaunt thingis; and the mouth of wickid men byholdith weiward thingis. ¹⁸ A gileful balaunce is abhominacioun anentis God; and an euene weiyte is his wille. ¹⁹ Where pride is, there also dispising schal be; but where meeknesse is, there also is wisdom. ²⁰ The simplenesse of iust men schal dresse hem; and the disseyuyng of weiward men schal destrie hem. ²¹ Richessis schulen not profite in the dai of veniaunce; but riytfulnesse schal delyuere fro deth. ²² The riytfulnesse of a simple man schal dresse his weie; and a wickid man schal falle in his wickidnesse. ²³ The riytfulnesse of riytful men schal delyuere hem; and wickid men schulen be takun in her aspiyngis. ²⁴ Whanne a wickid man is deed, noon hope schal be ferther; and abidyng of bisy men schal perische.