Proverbs 27

¹ He that kepith the comaundement of God, kepith his soule; but he that chargith not his weie, schal be slayn. ² He that hath mercy on a pore man, leeneth to the Lord; and he schal yelde his while to hym. ³ Teche thi sone, and dispeire thou not; but sette thou not thi soule to the sleyng of hym. ⁴ Forsothe he that is vnpacient, schal suffre harm; and whanne he hath rauyschid, he schal leie to anothir thing. ⁵ Here thou counsel, and take thou doctryn; that thou be wijs in thi laste thingis. ⁶ Many thouytis ben in the herte of a man; but the wille of the Lord schal dwelle. ⁷ A nedi man is merciful; and betere is a pore iust man, than a man liere. ⁸ The drede of the Lord ledith to lijf of blis; and he that dredith God schal dwelle in plentee, with outen visityng `of the worste. ⁹ A slow man hidith his hond vndur the armpit; and putteth it not to his mouth. ¹⁰ Whanne a man ful of pestilence is betun, a fool schal be wisere. If thou blamist a wijs man, he schal vndurstonde techyng. ¹¹ He that turmentith the fadir, and fleeth fro the modir, schal be ful of yuel fame, and schal be cursid. ¹² Sone, ceesse thou not to here techyng; and knowe thou the wordis of kunnyng. ¹³ A wickid witnesse scorneth doom; and the mouth of vnpitouse men deuourith wickidnesse. ¹⁴ Domes ben maad redi to scorneris; and hameris smytynge ben maad redi to the bodies of foolis. ¹⁶ Wiyn is a letcherouse thing and drunkenesse is ful of noise; who euere delitith in these, schal not be wijs. ¹⁷ As the roryng of a lioun, so and the drede of the kyng; he that territh hym to ire, synneth ayens his owne lijf. ¹⁸ It is onour to a man that departith hym silf fro stryuyngis; but fonned men ben medlid with dispisyngis. ¹⁹ A slow man nolde ere for coold; therfor he schal begge in somer, and me schal not yyue to hym. ²⁰ As deep watir, so counsel is in the herte of a man; but a wijs man schal drawe it out. ²¹ Many men ben clepid merciful; but who schal fynde a feithful man? ²² Forsothe a iust man that goith in his simplenesse, schal leeue blessid sones aftir hym. ²³ A king that sittith in the seete of doom, distrieth al yuel bi his lokyng. ²⁴ Who may seie, Myn herte is clene; Y am clene of synne? ²⁵ A weiyte and a weiyte, a mesure and a mesure, euer eithir is abhomynable at God. ²⁶ A child is vndurstondun bi hise studies, yf his werkis ben riytful and cleene. ²⁷ An eere heringe, and an iye seynge, God made euere eithir.