Proverbs 29

¹ A iust man of the hous of a wickid man thenkith, to withdrawe wickid men fro yuel. ² He that stoppith his eere at the cry of a pore man, schal crye also, and schal not be herd. ³ A yift hid quenchith chidyngis; and a yift in bosum quenchith the moost indignacioun. ⁴ It is ioye to a iust man to make doom; and it is drede to hem that worchen wickidnesse. ⁵ A man that errith fro the weie of doctryn, schal dwelle in the cumpany of giauntis. ⁶ He that loueth metis, schal be in nedynesse; he that loueth wiyn and fatte thingis, schal not be maad riche. ⁷ An vnpitouse man schal be youun for a iust man; and a wickid man schal be youun for a riytful man. ⁸ It is betere to dwelle in a desert lond, than with a womman ful of chidyng, and wrathful. ⁹ Desirable tresoure and oile is in the dwelling places of a iust man; and an vnprudent man schal distrie it. ¹⁰ He that sueth riytfulnesse and mercy, schal fynde lijf and glorie. ¹¹ A wijs man stiede `in to the citee of stronge men, and distriede the strengthe of trist therof. ¹² He that kepith his mouth and his tunge, kepith his soule from angwischis. ¹³ A proude man and boosteere is clepid a fool, that worchith pride in ire. ¹⁴ Desiris sleen a slow man; for hise hondis nolden worche ony thing. ¹⁵ Al dai he coueitith and desirith; but he that is a iust man, schal yyue, and schal not ceesse. ¹⁶ The offringis of wickid men, that ben offrid of greet trespas, ben abhomynable. ¹⁷ A fals witnesse schal perische; a man obedient schal speke victorie. ¹⁸ A wickid man makith sad his cheer vnschamefastli; but he that is riytful, amendith his weie. ¹⁹ No wisdom is, no prudence is, no counsel is ayens the Lord. ²⁰ An hors is maad redi to the dai of batel; but the Lord schal yyue helthe. ²² Betere is a good name, than many richessis; for good grace is aboue siluer and gold. ²³ A riche man and a pore man metten hem silf; the Lord is worchere of euer eithir. ²⁴ A felle man seeth yuel, and hidith him silf; and an innocent man passid, and he was turmentid bi harm. ²⁵ The ende of temperaunce is the drede of the Lord; richessis, and glorye, and lijf. ²⁶ Armuris and swerdis ben in the weie of a weiward man; but the kepere of his soule goith awey fer fro tho. ²⁷ It is a prouerbe, A yong wexynge man bisidis his weie, and whanne he hath wexe elde, he schal not go awei fro it.