Proverbs 9

¹ Mi sone, if synneris flateren thee, assente thou not to hem. ² If thei seien, Come thou with vs, sette we aspies to blood, hide we snaris of disseitis ayens an innocent without cause; ³ swolowe we him, as helle swolowith a man lyuynge; and al hool, as goynge doun in to a lake; we schulen fynde al preciouse catel, ⁴ we schulen fille oure housis with spuylis; sende thou lot with vs, ⁵ o purs be of vs alle; ⁶ my sone, go thou not with hem; forbede thi foot fro the pathis of hem. ⁷ For the feet of hem rennen to yuel; and thei hasten to schede out blood. ⁸ But a net is leid in veyn bifore the iyen of briddis, that han wengis. ⁹ Also `thilke wickid disseyueris setten aspies ayens her owne blood; and maken redi fraudis ayens her soulis. ¹⁰ So the pathis of ech auerouse man rauyschen the soulis of hem that welden. ¹¹ Wisdom prechith with outforth; in stretis it yyueth his vois. ¹² It crieth ofte in the heed of cumpenyes; in the leeues of yatis of the citee it bringith forth hise wordis, ¹³ and seith, Hou long, ye litle men in wit, louen yong childhod, and foolis schulen coueyte tho thingis, that ben harmful to hem silf, and vnprudent men schulen hate kunnyng? ¹⁴ Be ye conuertid at my repreuyng; lo, Y schal profre forth to you my spirit, and Y schal schewe my wordis. ¹⁵ For Y clepide, and ye forsoken; Y helde forth myn hond, and noon was that bihelde. ¹⁶ Ye dispisiden al my councel; and chargiden not my blamyngis. ¹⁷ And Y schal leiye in youre perisching; and Y schal scorne you, whanne that, that ye dreden, cometh to you. ¹⁸ Whanne sodeyne wretchidnesse fallith in, and perisching bifallith as tempest; whanne tribulacioun and angwisch cometh on you.