Psalms 105

¹ We weren glad for the daies in whiche thou madist vs meke; for the yeeris in whiche we siyen yuels. ² Lord, biholde thou into thi seruauntis, and in to thi werkis; and dresse thou the sones of hem. ³ And the schynyng of oure Lord God be on vs; and dresse thou the werkis of oure hondis on vs, and dresse thou the werk of oure hondis. ⁵ The nyntithe salm. He that dwellith in the help of the hiyeste God; schal dwelle in the proteccioun of God of heuene. 6 He schal seie to the Lord, Thou art myn vptaker, and my refuit; my God, Y schal hope in him. 7 For he delyuered me fro the snare of hunteris; and fro a scharp word. 8 With hise schuldris he schal make schadowe to thee; and thou schalt haue hope vnder hise fetheris. 9 His treuthe schal cumpasse thee with a scheld; thou schalt not drede of nyytis drede. 10 Of an arowe fliynge in the dai, of a gobelyn goynge in derknessis; of asailing, and a myddai feend. 11 A thousynde schulen falle doun fro thi side, and ten thousynde fro thi riytside; forsothe it schal not neiye to thee. 12 Netheles thou schalt biholde with thin iyen; and thou schalt se the yelding of synneris. 13 For thou, Lord, art myn hope; thou hast set thin help altherhiyeste. 14 Yuel schal not come to thee; and a scourge schal not neiye to thi tabernacle. 15 For God hath comaundid to hise aungels of thee; that thei kepe thee in alle thi weies. 16 Thei schulen beere thee in the hondis; leste perauenture thou hirte thi foot at a stoon. 17 Thou schalt go on a snake, and a cocatrice; and thou schalt defoule a lioun and a dragoun. 18 For he hopide in me, Y schal delyuere hym; Y schal defende him, for he knew my name. 19 He criede to me, and Y schal here him, Y am with him in tribulacioun; Y schal delyuere him, and Y schal glorifie hym. 20 I schal fille hym with the lengthe of daies; and Y schal schewe myn helthe to him. 22 The title of the oon and nyntithe salm. The salm of song, in the dai of sabath. ²³ It is good to knouleche to the Lord; and to synge to thi name, thou hiyeste. ²⁴ To schewe eerli thi merci; and thi treuthe bi nyyt. ²⁵ In a sautrie of ten cordis; with song in harpe. ²⁶ For thou, Lord, hast delitid me in thi makyng; and Y schal make ful out ioye in the werkis of thin hondis. ²⁷ Lord, thi werkis ben magnefied greetli; thi thouytis ben maad ful depe. ²⁸ An vnwise man schal not knowe; and a fool schal not vndirstonde these thingis. ²⁹ Whanne synneris comen forth, as hey; and alle thei apperen, that worchen wickidnesse. ³⁰ That thei perische in to the world of world; forsothe thou, Lord, art the hiyest, withouten ende. For lo! ³¹ Lord, thin enemyes, for lo! thin enemyes schulen perische; and alle schulen be scaterid that worchen wickidnesse. ³² And myn horn schal be reisid as an vnicorn; and myn eelde in plenteuouse merci. ³³ And myn iye dispiside myn enemyes; and whanne wickid men rysen ayens me, myn eere schal here. ³⁴ A iust man schal floure as a palm tree; he schal be multiplied as a cedre of Liban. ³⁵ Men plauntid in the hous of the Lord; schulen floure in the porchis of the hous of oure God. ³⁶ Yit thei schulen be multiplied in plenteuouse elde; and thei schulen be suffryng wel. That thei telle, that oure Lord God is riytful; and no wickidnesse is in hym. ³⁹ The two and nyntithe salm. The Lord hath regned, he is clothid with fairnesse; the Lord is clothid with strengthe, and hath gird hym silf. ⁴⁰ For he made stidefast the world; that schal not be moued. ⁴¹ God, thi seete was maad redi fro that tyme; thou art fro the world. Lord, the flodis han reisid; the flodis han reisid her vois. Flodis reisiden her wawis; of the voicis of many watris. ⁴² The reisyngis of the see ben wondurful; the Lord is wondurful in hiye thingis. ⁴³ Thi witnessingis ben maad able to be bileued greetli; Lord, holynesse bicometh thin hous, in to the lengthe of daies. ⁴⁵ The thre and nyntithe salm. God is Lord of veniauncis; God of veniauncis dide freli.