Psalms 106

¹ Lord, hou longe synneris; hou longe schulen synneris haue glorie? ² Thei schulen telle out, and schulen speke wickidnesse; alle men schulen speke that worchen vnriytfulnesse. ³ Lord, thei han maad lowe thi puple; and thei han disesid thin eritage. ⁴ Thei killiden a widowe and a comelyng; and thei han slayn fadirles children and modirles. ⁵ And thei seiden, The Lord schal not se; and God of Jacob schal not vndurstonde. ⁶ Ye vnwise men in the puple, vndirstonde; and, ye foolis, lerne sum tyme. ⁷ Schal not he here, that plauntide the eere; ethere biholdith not he, that made the iye? ⁸ Schal not he repreue, that chastisith folkis; which techith man kunnyng? ⁹ The Lord knowith the thouytis of men; that tho ben veyne. ¹⁰ Blessid is the man, whom thou, Lord, hast lerned; and hast tauyt him of thi lawe. ¹¹ That thou aswage hym fro yuele daies; til a diche be diggid to the synner. ¹² For the Lord schal not putte awei his puple; and he schal not forsake his eritage. ¹³ Til riytfulnesse be turned in to dom; and who ben niy it, alle that ben of riytful herte. ¹⁴ Who schal rise with me ayens mysdoeris; ether who schal stonde with me ayens hem that worchen wickidnesse? ¹⁵ No but for the Lord helpide me; almest my soule hadde dwellid in helle. ¹⁶ If Y seide, My foot was stirid; Lord, thi merci helpide me. ¹⁷ Aftir the multitude of my sorewis in myn herte; thi coumfortis maden glad my soule. ¹⁸ Whether the seete of wickidnesse cleueth to thee; that makist trauel in comaundement? ¹⁹ Thei schulen take ayens the soule of a iust man; and thei schulen condempne innocent blood. ²⁰ And the Lord was maad to me in to refuyt; and my God was maad in to the help of myn hope. ²¹ And he schal yelde to hem the wickidnesse of hem; and in the malice of hem he schal lese hem, oure Lord God schal lese hem. ²³ The foure and nyntithe salm. Come ye, make we ful out ioie to the Lord; hertli synge we to God, oure heelthe. ²⁴ Bifore ocupie we his face in knowleching; and hertli synge we to him in salmes. ²⁵ For God is a greet Lord, and a greet king aboue alle goddis; for the Lord schal not putte awei his puple. ²⁶ For alle the endis of erthe ben in his hond; and the hiynesses of hillis ben hise. ²⁷ For the see is his, and he made it; and hise hondis formeden the drie lond. ²⁸ Come ye, herie we, and falle we doun bifore God, wepe we bifore the Lord that made vs; ²⁹ for he is oure Lord God. And we ben the puple of his lesewe; and the scheep of his hond. ³⁰ If ye han herd his vois to dai; nyle ye make hard youre hertis. ³¹ As in the terryng to wraththe; bi the dai of temptacioun in desert. Where youre fadris temptiden me; thei preueden and sien my werkis. ³² Fourti yeer I was offendid to this generacioun; and Y seide, Euere thei erren in herte. ³³ And these men knewen not my weies; to whiche Y swoor in myn ire, thei schulen not entre in to my reste. ³⁵ The fyue and nyntithe salm hath no title. Singe ye a newe song to the Lord; al erthe, synge ye to the Lord. ³⁶ Synge ye to the Lord, and blesse ye his name; telle ye his heelthe fro dai in to dai. ³⁷ Telle ye his glorie among hethene men; hise merueilis among alle puplis. ³⁸ For the Lord is greet, and worthi to be preisid ful myche; he is ferdful aboue alle goddis. ³⁹ For alle the goddis of hethene men ben feendis; but the Lord made heuenes. ⁴⁰ Knouleching and fairnesse is in his siyt; hoolynesse and worthi doyng is in his halewing. ⁴¹ Ye cuntrees of hethene men, brynge to the Lord, bringe ye glorye and onour to the Lord; ⁴² bringe ye to the Lord glorie to hys name. Take ye sacrificis, and entre ye in to the hallis of hym; ⁴³ herie ye the Lord in his hooli halle. Al erthe be moued of his face; ⁴⁴ seie ye among hethene men, that the Lord hath regned. And he hath amendid the world, that schal not be moued; he schal deme puplis in equite. ⁴⁵ Heuenes be glad, and the erthe make ful out ioye, the see and the fulnesse therof be moued togidere; feeldis schulen make ioye, ⁴⁶ and alle thingis that ben in tho. Thanne alle the trees of wodis schulen make ful out ioye, for the face of the Lord, for he cometh; ⁴⁷ for he cometh to deme the erthe. He schal deme the world in equite; and puplis in his treuthe.