Psalms 115

¹ seke ye the Lord, and be ye confermed; seke ye euere his face. ² Haue ye mynde on hise merueilis, whiche he dide; on his grete wondris, and domes of his mouth. ³ The seed of Abraham, his seruaunt; the sones of Jacob, his chosun man. ⁴ He is oure Lord God; hise domes ben in al the erthe. ⁵ He was myndeful of his testament in to the world; of the word which he comaundide in to a thousynde generaciouns. ⁶ Which he disposide to Abraham; and of his ooth to Isaac. ⁷ And he ordeynede it to Jacob in to a comaundement; and to Israel in to euerlastinge testament. ⁸ And he seide, I shal yiue to thee the lond of Canaan; the cord of youre eritage. ⁹ Whanne thei weren in a litil noumbre; and the comelingis of hem weren ful fewe. ¹⁰ And thei passiden fro folk in to folk; and fro a rewme in to another puple. ¹¹ He lefte not a man to anoye hem; and he chastiside kyngis for hem. ¹² Nile ye touche my cristis; and nyle ye do wickidli among my prophetis. ¹³ And God clepide hungir on erthe; and he wastide al the stidefastnesse of breed. ¹⁴ He sente a man bifore hem; Joseph was seeld in to a seruaunt. ¹⁵ Thei maden lowe hise feet in stockis, irun passide by his soule; til the word of him cam. ¹⁶ The speche of the Lord enflawmede him; ¹⁷ the king sente and vnbond hym; the prince of puplis sente and delyuerede him. ¹⁸ He ordeynede him the lord of his hous; and the prince of al his possessioun.