Psalms 116

¹ And Israel entride in to Egipt; and Jacob was a comeling in the lond of Cham. ² And God encreesside his puple greetli; and made hym stidefast on hise enemyes. ³ He turnede the herte of hem, that thei hatiden his puple; and diden gile ayens hise seruauntis. ⁴ He sent Moises, his seruaunt; thilke Aaron, whom he chees. ⁵ He puttide in hem the wordis of hise myraclis; and of hise grete wondris in the lond of Cham. ⁶ He sente derknessis, and made derk; and he made not bitter hise wordis. ⁷ He turnede the watris of hem in to blood; and he killide the fischis of hem. ⁸ And the lond of hem yaf paddoks; in the priue places of the kyngis of hem. ⁹ God seide, and a fleische flie cam; and gnattis in alle the coostis of hem. ¹⁰ He settide her reynes hail; fier brennynge in the lond of hem. ¹¹ And he smoot the vynes of hem, and the fige trees of hem; and al to-brak the tree of the coostis of hem. ¹² He seide, and a locuste cam; and a bruk of which was noon noumbre. ¹³ And it eet al the hey in the lond of hem; and it eet al the fruyt of the lond of hem. ¹⁴ And he killide ech the firste gendrid thing in the lond of hem; the firste fruitis of alle the trauel of hem. ¹⁵ And he ledde out hem with siluer and gold; and noon was sijk in the lynagis of hem. ¹⁶ Egipt was glad in the goyng forth of hem; for the drede of hem lai on Egipcians. ¹⁷ He spredde abrood a cloude, in to the hiling of hem; and fier, that it schynede to hem bi nyyt. ¹⁸ Thei axiden, and a curlew cam; and he fillide hem with the breed of heuene. ¹⁹ He brak a stoon, and watris flowiden; floodis yeden forth in the drye place.