Psalms 118

² The title of the hundrid and fifthe salm. Alleluya. Kouleche ye to the Lord, for he is good; for his mercy is with outen ende. 3 Who schal speke the powers of the Lord; schal make knowun alle hise preisyngis? 4 Blessid ben thei that kepen dom; and doon riytfulnesse in al tyme. 5 Lord, haue thou mynde on vs in the good plesaunce of thi puple; visite thou vs in thin heelthe. 6 To se in the goodnesse of thi chosun men, to be glad in the gladnes of thi folk; that thou be heried with thin eritage. 7 We han synned with oure fadris; we han do vniustli, we han do wickidnesse. 8 Oure fadris in Egipt vndirstoden not thi merueils; thei weren not myndeful of the multitude of thi merci. And thei stiynge in to the see, in to the reed see, terreden to wraththe; 9 and he sauede hem for his name, that he schulde make knowun his power. ¹⁰ And he departide the reed see, and it was dried; and he lede forth hem in the depthis of watris as in deseert. ¹¹ And he sauede hem fro the hond of hateris; and he ayen bouyte hem fro the hond of the enemye. ¹² And the watir hilide men troublynge hem; oon of hem abood not. ¹³ And thei bileueden to hise wordis; and thei preisiden the heriynge of hym. ¹⁴ Thei hadden `soone do, thei foryaten hise werkis; and thei abididen not his councel. ¹⁵ And thei coueitiden coueitise in deseert; and temptiden God in a place with out watir. ¹⁶ And he yaf to hem the axyng of hem; and he sente fulnesse in to the soulis of hem. ¹⁷ And thei wraththiden Moyses in the castels; Aaron, the hooli of the Lord. ¹⁸ The erthe was opened, and swolewid Datan; and hilide on the congregacioun of Abiron. ¹⁹ And fier brente an hiye in the synagoge of hem; flawme brente synneris. ²⁰ And thei maden a calf in Oreb; and worschipiden a yotun ymage. ²¹ And thei chaungiden her glorie; in to the liknesse of a calf etynge hei. ²² Thei foryaten God, that sauede hem, that dide grete werkis in Egipt, ²³ merueils in the lond of Cham; feerdful thingis in the reed see. ²⁴ And God seide, that he wolde leese hem; if Moises, his chosun man, hadde not stonde in the brekyng of his siyt. That he schulde turne awei his ire; lest he loste hem. ²⁵ And thei hadden the desirable lond for nouyt, thei bileueden not to his word, and thei grutchiden in her tabernaclis; ²⁶ thei herden not the vois of the Lord. ²⁷ And he reiside his hond on hem; to caste doun hem in desert. ²⁸ And to caste awei her seed in naciouns; and to leese hem in cuntreis. ²⁹ And thei maden sacrifice to Belfagor; and thei eeten the sacrificis of deed beestis.