Psalms 132

¹ Lede me forth in the path of thin heestis; for Y wolde it. ² Bowe thou myn herte in to thi witnessingus; and not in to aueryce.</span> <span class="verse" data-verse="3"><sup>3</sup> Turne thou awei myn iyen, that tho seen not vanyte; quykene thou me in thi weie. ⁴ Ordeyne thi speche to thi seruaunt; in thi drede. ⁵ Kitte awey my schenschip, which Y supposide; for thi domes ben myrie. ⁶ Lo! Y coueitide thi comaundementis; quikene thou me in thin equite. ⁷ And, Lord, thi merci come on me; thin heelthe come bi thi speche. ⁸ And Y schal answere a word to men seiynge schenschipe to me; for Y hopide in thi wordis. ⁹ And take thou not awei fro my mouth the word of treuthe outerli; for Y hopide aboue in thi domes. ¹⁰ And Y schal kepe thi lawe euere; in to the world, and in to the world of world. ¹¹ And Y yede in largenesse; for Y souyte thi comaundementis. ¹² And Y spak of thi witnessyngis in the siyt of kingis; and Y was not schent. ¹³ And Y bithouyte in thin heestis; whiche Y louede. ¹⁴ And Y reiside myn hondis to thi comaundementis, whiche Y louede; and Y schal be excercisid in thi iustifiyngis. ¹⁵ Lord, haue thou mynde on thi word to thi seruaunt; in which word thou hast youe hope to me. ¹⁶ This coumfortide me in my lownesse; for thi word quikenede me. ¹⁷ Proude men diden wickidli bi alle thingis; but Y bowide not awei fro thi lawe. ¹⁸ Lord, Y was myndeful on thi domes fro the world; and Y was coumfortid.