Psalms 135

¹ At mydnyyt Y roos to knouleche to thee; on the domes of thi iustifiyngis. ² I am parcener of alle that dreden thee; and kepen thin heestis. ³ Lord, the erthe is ful of thi merci; teche thou me thi iustifiyngis. ⁴ Lord, thou hast do goodnesse with thi seruaunt; bi thi word. ⁵ Teche thou me goodnesse, and loore, and kunnyng; for Y bileuede to thin heestis. ⁶ Bifor that Y was maad meke, Y trespasside; therfor Y kepte thi speche. ⁷ Thou art good; and in thi goodnesse teche thou me thi iustifiyngis. ⁸ The wickidnesse of hem that ben proude, is multiplied on me; but in al myn herte Y schal seke thin heestis. ⁹ The herte of hem is cruddid as mylk; but Y bithouyte thi lawe. ¹⁰ It is good to me, that thou hast maad me meke; that Y lerne thi iustifiyngis. ¹¹ The lawe of thi mouth is betere to me; than thousyndis of gold and of siluer. ¹² Thin hondis maden me, and fourmeden me; yyue thou vndurstondyng to me, that Y lerne thin heestis. ¹³ Thei that dreden thee schulen se me, and schulen be glad; for Y hopide more on thi wordis. ¹⁴ Lord, Y knewe, that thi domes ben equite; and in thi treuth thou hast maad me meke. ¹⁵ Thi merci be maad, that it coumforte me; bi thi speche to thi seruaunt. ¹⁶ Thi merciful doyngis come to me, and Y schal lyue; for thi lawe is my thenkyng. ¹⁷ Thei that ben proude be schent, for vniustli thei diden wickidnesse ayens me; but Y schal be exercisid in thin heestis. ¹⁸ Thei that dreden thee be turned to me; and thei that knowen thi witnessyngis. ¹⁹ Myn herte be maad vnwemmed in thi iustifiyngis; that Y be not schent. ²⁰ Mi soule failide in to thin helthe; and Y hopide more on thi word. ²¹ Myn iyen failiden in to thi speche; seiynge, Whanne schalt thou coumforte me?