Psalms 136

¹ Hou many ben the daies of thi seruaunt; whanne thou schalt make doom of hem that pursuen me? ² Wickid men telden to me ianglyngis; but not as thi lawe. ³ Alle thi comaundementis ben treuthe; wickid men han pursued me, helpe thou me. ⁴ Almeest thei endiden me in erthe; but I forsook not thi comaundementis. ⁵ Bi thi mersi quikene thou me; and Y schal kepe the witnessingis of thi mouth. ⁶ Lord, thi word dwellith in heuene; with outen ende. ⁷ Thi treuthe dwellith in generacioun, and in to generacioun; thou hast foundid the erthe, and it dwellith. ⁸ The dai lastith contynueli bi thi ordynaunce; for alle thingis seruen to thee. ⁹ No but that thi lawe was my thenking; thanne perauenture Y hadde perischid in my lownesse. ¹⁰ With outen ende Y schal not foryete thi iustifiyngis; for in tho thou hast quikened me. ¹¹ I am thin, make thou me saaf; for Y haue souyt thi iustifiyngis. ¹² Synneris aboden me, for to leese me; Y vndurstood thi witnessingis. ¹³ I siy the ende of al ende; thi comaundement is ful large. ¹⁴ Lord, hou louede Y thi lawe; al dai it is my thenking. ¹⁵ Aboue myn enemyes thou madist me prudent bi thi comaundement; for it is to me with outen ende. ¹⁶ I vndurstood aboue alle men techinge me; for thi witnessingis is my thenking. ¹⁷ I vndirstood aboue eelde men; for Y souyte thi comaundementis. ¹⁸ I forbeed my feet fro al euel weie; that Y kepe thi wordis. ¹⁹ I bowide not fro thi domes; for thou hast set lawe to me. ²⁰ Thi spechis ben ful swete to my cheekis; aboue hony to my mouth. ²¹ I vnderstood of thin heestis; therfor Y hatide al the weie of wickidnesse. ²² Thi word is a lanterne to my feet; and liyt to my pathis. ²³ I swoor, and purposide stidefastli; to kepe the domes of thi riytfulnesse. ²⁴ I am maad low bi alle thingis; Lord, quykene thou me bi thi word. ²⁵ Lord, make thou wel plesinge the wilful thingis of my mouth; and teche thou me thi domes. ²⁶ Mi soule is euere in myn hondis; and Y foryat not thi lawe.